Tinata Valavalar 16:3-28

³Una nur tar kaum lavur papalum tai ra Luluai, Ma da ga pait ot pa ra umana magit u ga nuk pa ia.

⁴A Luluai i ga pait ra lavur magit ure kadia papalum tikatikai, Ma ra tena varpiam iat ure ra bung na vinirua.

⁵Diat par ba i ngala ra nuknuk i diat ure diat mulai, ra Luluai i milikuane diat; A dovotina muka, a varkurai na tadav diat.

⁶Di varkul ure ra varpiam ma ra varmari ma ra dovotina, Ma ba di ru ra Luluai a tarai dia vana kan ra varpiam.

⁷Ba ra Luluai i manane ra mangamangana kai ta tikai, I vamaram guve diat ma kana lavur ebar bula.

⁸A ikilik na tabarikik ba i tur varurung ma ra mangamangana takodo I boina ta dir ma ra ngala na vapuak varurung ma ra mangamangana ba pa i takodo.

⁹A tutana i nununuk upi ra nga ba na vana tana, Ma ra Luluai i vateten tar kana vinavana tana.

¹⁰A mamat na tinata i arikai ta ra ngie i ra king, Ba i varkurai ra ngiene pa na rara.

¹¹A takodo na valavalar ma ra takodo na mamat dir vuna tai ra Luluai, Ia iat i ga pait ra lavur mamat ta ra kakakap.

¹²A umana king dia milmilikuane tuna ra kaina mangamangana, Tago ra kiki na king i tur dekdek ta ra mangamangana takodo.

¹³A umana king dia manga gugu ta ra takodo na tinata, Ma dia manane nina ba i ko kana pirpir.

¹⁴A kankan kai ra king i da ra tena varvai ure ra minat, A tena kabinana i vamaram pa ia.

¹⁵Ba ra king i matana varmari i da ra nilaun, Ma kana varmananai i da ra bakut na bata.

¹⁶A niongor upi ra kabinana i boina ta dir ma ra niongor upi ra goled; I boina ba da pilak pa ra niongor upi ra minatoto, ma koko ra niongor upi ra silva.

¹⁷A nga kai ra dovot na tarai i vana irai kan ra varpiam; Nina i balaure kana vinavana i vaale bat kana nilaun.

¹⁸A mangamangana kolakolo i lua, namur ra vinirua; Ma ra papait na luluai i lua, namur ra bunura.

¹⁹I boina ba na madu ra bala i dat varurung ma ra umana luveana, Ma pa i boina ba da kale ra magit di ga ra pa ia varurung ma diat dia papait na luluai.

²⁰Nina i nuk pa ra tinata na tikan tadav ra boina, Ma nina i nurnur tai ra Luluai i ti doan.

²¹Nina i kabinana ra nuknukina da vatang ia ba a matotono, Ma ba i kalakalami ra tinata a vartovo na tavua.

²²Ba tikai i vatur vake ra minatoto i da ra mata na nilaun pirana, Ma ra papaua kai ra umana lunga i vakadik diat.

²³A nuknuk i ra tena kabinana i vateten ra ngiene, Ma i vanot kana pirpir ma ra kabinana.

²⁴A mari na tinata i da ra polo na livur, I kalakalami ta ra bala i dat, ma ra uru i dat i lagar tana.

²⁵Tika na nga a tarai dia biti ba i takodo, Ma ra tukuna i tadav ra minat.

²⁶A mamainga kai ra tena papalum upi ra magit i vuna ta kana niongor, Tago ra mulmulum i varvargat ia.

²⁷A tutana vakuku i nuknuk upi ra kaina, Ma kana tinata i maramararang.

²⁸A tavir na tutana i imire vurvurbingitane ra varngangar, Ma ra tena varmaianao i varbaiane diat dia ki na bartalaina tuna.