Bugagia Bidibo Kolesagade Po Asęai Buku 16:3-28

³Te tigidali sę nago yainu homu eyu da, te nago Genuai Bidi nogoba te sę muao. Tama agai te sę dabe wiegi yai pedalumainu ilaibao.

⁴Genuai Bidigo te tigidali nai nigilama, tama augwalide te sę dabe elalubao. Tama tiwai naga, Genuai Bidigo te dwai kolesaga yabo bidi dabe nigilali, tama agai augwali nigali te po tųde hagamainu nigalio.

⁵Genuai Bidigo te hagoma ebo bidi dabe, me te augwa digi augwa nogi ugwaba sabo bidi dabe, te agai wei mu me isiąyu, augwali dali dwai homu ebo dao. Dago e tama koneao, Genuai Bidigo augwali te odolali me tagala palogobeo. Menio. Te agai augwaliba te tigi dene mawaibao.

⁶Te bidigo Genuai Bidi godolo homu mu elama, tama aga dali mu kęą pobaso da, teda Genuai Bidigo te agai sęgę sela sąwaibao. Tama te bidi Genuai Bidide wi eyu, aga dologode bidibaso da, teda te bidigo te dwai sę ebo kolesaga te ela sobaso, usu yaibao.

⁷Te bidigo te Genuai Bidigo wei homu yabo tobage kolesaga dabe ebaso da, teda te Genuai Bidigo aga tau siyu, te tigidali bidi, me te aga boi bidi dabe dali, te augwali aga dali bugagia bidimainu tau saibao.

⁸Te nago dwasianu nai naga elalu, tama nago doloba pai kolesaga wali pobaso da, teda nago te tebo ulago te moni mone pesage hauwa umabo elalubo bidigo te dwai sę ebo kolesaga ebo bidi te aiyaba elalueibao.

⁹Dago te dago yainogo homu ebo sęde homu kone palobo dao. Tiali goli, Genuai Bidigo te da bilibo dolasa bilimainu ebo dao.

¹⁰Te kingo po te bulude bidibo bidi dabebolo wabo sogo, te agai te Genuai Bidigo agabolo mani po pusubo tiwai ebao. Tama tibaso, te bidi te po tų ebode dagalubo sogo, agai te doloba pai po tų naga yao.

¹¹Genuai Bidigo homugo te tigidali skel me usu sabo nai meta te dąį wali dolo pomainu homu eyu, tama te we bidi ili po ola momainu igio.

¹²Te king dabego te dwai kolesaga ebo te hagela homu mu ebao, magi baso meni, te gavmanigo doloba pai kolesaga eyu da, teda te bomo elalueibao.

¹³Kingo te mu po naga wabo bidi wei mu ebo dao. Awe, te tobage bidi te kingo gedude te dwagi yai bidi mu dao.

¹⁴Te kingo bidi me delide haliga sębę eyu da, teda te kingo aga ela muaibao. Tiali goli, te wiegi yai homu elalubo bidigo da, agai te king dua digi te haliga nagame ma ilaibao.

¹⁵Te kingo bugai haliga pemene te bidi me deli dali ebaso da, teda agai te bidiba wiegi yai sę eyu, tama aga te bugagia bidaibao. Kingo te tebo kolesagago te pǫgo tulubage selasa aselama, tama te nai tau emainu ebo tiwai ebo dao.

¹⁶Te nago wiegi yai homu kolesaga te koneama sobaso da, teda tego te gol hauwa me silva te aiyaba mu elalubo dao.

¹⁷Te doloba pai hani bidigo te dwai kolesaga ela soabo sunumi wali paibao. Te bidigo aga bilibo te bugagia tonalu bilibaso da, te aga bugagia bidaibao.

¹⁸Te hagoma ebo kolesaga eyu, tama naga digi naga nogi ugaba siyu da, te nage tulaluama tama dolabo sę ilaibao.

¹⁹Te bidi te magi nai meni yai bidi mu elama, tama aga digi aiyaba elalubaso da, te kolesagago te hagoma bidi dabego te gasa bidi dabego doado bage hauwa wi selama, te augwade digi te dobola sabo kolesaga ebo bidi dabe te aiyaba mu elalubao.

²⁰Te bidi dabego aga ola mabo poba olo bugagia munama te po odobaso da, teda aga bugagia bidibo kolesaga elaluaibao. Tama bidigo konealubo po Genuai Bidiba dąų obaso da, te aga wiegi yai homu pemene yaibao.

²¹Te bidi dabego koneani, te wiegi yai homu kolesaga elalubo bidi yai baso da, teda agai te tobage homu kolesaga dabe dagalobaso, te usu yaibao. Tama aga te wiegi yai po wabo bidi yai baso da, teda te bidi dabego agai po odobo wei mu yaibao.

²²Te dwagi yai homu kolesaga bidi elalu da, teda te agaba te bidibo ula mabo ąį tiwai ebao. Tiali goli, te dwagi yai homu elalusiąbo bidi dabe, augwaligo te dobo kolesaga eyu, tama tego augwa digi dolobo dao.

²³Te wiegi yai homu elalubo bidigo, agai te hasia bolo bugagia homu kone palama, tama nosali agai wiegi yai po waibao. Tama tebogo te bidi dabego agai po odabo godolo homu yaibao.

²⁴Te wiegi yai po te tubo nai hani tiwai yaibao, te pusu mu elama, tama te we bidigo tigi bomo ilibo dao.

²⁵Te bidi mebago te homu yai, te augwa kolesaga te wiegi yai da olama, tama augwaligo te wiegi yai sunumi wali poba homu yai. Tiali goli, menio. Augwaligo te elala pidu genama, tama nosali te augwali isaibao.

²⁶Te sę ebo bidi dabego koneani, te augwaligo sę bomo isiąyu da, teda augwali tubo nai meni yaibao, tama tego augwali te sę dene mu yaibao.

²⁷Bidi dwai mugo te haniani sunumi gegelama, te dwai sę te gasa we bidi dabeba yainu tiaibao. Agai po da, te genuai sia bogoli tiwai eyu, tama te augwali dolobo dao.

²⁸Te dwai kolesaga ebo bidigo te augwa hasi digi tomode te po konila ebo kolesaga ilaibao. Tama te posobo po wabo bidigo te bidi aga abagi dali te wado po wabo sę ilaibao.