Soakas 16:3-28

³Siyuk LEUM GOD Elan akinsewowoye pwapa lom, na kom ac fah ku in orala.

⁴Ma nukewa LEUM GOD El orala ac oasr saflaiya; na saflaiyen mwet koluk uh pa in sikiyukla.

⁵LEUM GOD El srunga mwet nukewa su filang. El ac fah tia lela elos in kaingkunla mwe kaiyuk nu selos.

⁶Kom in oaru ac inse pwaye, ac God El fah nunak munas ke ma koluk lom. Alfulatye LEUM GOD na wangin ma koluk ac fah sikyak nu sum.

⁷Pacl kom akinsewowoye LEUM GOD, mwet lokoalok lom uh ac ekla mwet kawuk lom.

⁸Kom fin eis srik ke inkanek suwohs, wo liki ke kom eis yohk ke inkanek sesuwos.

⁹Kom ku in lumahla ma kom ac oru, a God pa ac oakiya inkanek lom.

¹⁰Tokosra el kaskas ke ku sin God me; na sulela lal pwaye pacl nukewa.

¹¹LEUM GOD El lungse tuh mwe paun ac mwe srikasrak nukewa in suwohs, ac molin mwe kuka in fal.

¹²Tokosra elos tia ku in lela ma koluk in orek, mweyen nununku suwohs pa oru sie mutunfacl in ku.

¹³Sie tokosra el lungse lohng ma pwaye, ac el insewowo selos su kaskas suwohs.

¹⁴Mwet lalmwetmet elos srike in akenganye tokosra, mweyen el fin kasrkusrakak, ac ku in oasr mwet misa.

¹⁵Sie tokosra fin insewowo sum, ac mwe insewowo nu ke moul lom; oana ke pukunyeng use af ke pacl mut.

¹⁶Arulana wo in oasr lalmwetmet ac etauk, liki in oasr gold ac silver.

¹⁷Mwet wo elos fufahsryesr ke soko inkanek ma ac tia kololos nu ke ma koluk; ouinge karinganang acn kom fahsr nu we — mweyen ac ku in molela moul lom.

¹⁸Inse fulat ac kol nu ke ongoiya lulap, ac mwet filang elos ac ikori.

¹⁹Wo kom in inse pusisel ac sukasrup, liki na kom in weang mwet inse fulat ac ipeis ke ma wap ma elos pisrala.

²⁰Lohang nu ke ma lutiyuk kom kac, na kom ac fah eis moul wo ouiya. Lulalfongi in LEUM GOD ac kom ac fah engan.

²¹Sie mwet lalmwetmet akilenyuk ke etauk lal. Fin wo kas in luti lal, mwet uh ac insewowo in lutlut sel.

²²Etauk el sie unon lun moul nu selos su lalmwetmet, a kom fin srike in luti mwet lalfon, kom sisla pacl lom ke wangin.

²³Mwet lalmwetmet elos nunkala mau meet liki elos kaskas; na ma elos fahk uh mwet uh engan in lohng.

²⁴Kas kulang uh emwem oana honey — wo emah, ac wo pac nu ke mano.

²⁵Inkanek soko ma kom nunku mu pwaya uh, sahp ac kolkomla nu ke misa.

²⁶Masrinsral lun sie mwet ac oru el orekma upa, tuh in ku in oasr mwe mongo nal.

²⁷Mwet koluk elos suk inkanek in aklokoalokye mwet. Kas lalos uh firirrir oana e.

²⁸Lesrik uh srumunyukelik sin mwet koluk. Elos purakak lokoalok ac kunausla inmasrlon kawuk uh.