Te Israel Tobolu Bidi Dabe 16:2-12

²Tama bidi mebago te Gasa bidi dabebolo waliyu, te po wali, “Samson asalio.” Tama tialima, augwaligo te bulu bagua selama, tama augwaligo aga te hanu bulu badu soabo sunumide geme dualaluyu tonaluali. Augwaligo te hulide kilikili me wabeo. Tama augwaligo tama homu yali, “Te dago tonaludubadi, te be posoboba usu nama, tama dago aga ela muaibao.” Te homu yali.

³Tiali goli, Samson te pibo sai betide pila mudu bididubadi, te be huli tomoba mu usu nani. Nosali aga hodaluama, tama te hanu buluba piduali, te sunumi nogogo tulama, tama agai te sunumi te dali, pos ni si me, te tigidali elaluali dąų wabo nai dabe tigidali gudali. Tama agai te sunumi doado bage dali te Hebron bulu pąde elaluali bulu duba ugwaba tolasa holalio.

⁴Te sę elama nosali, Samsongo te odogo bulu Sorek we me deli godolo homu yai. Te wego nogi te Delaila dao.

⁵Tama te a naga Filistia tobolu bidi te we Delailaba pelama, agabolo te po walali, “Nago aga homu bega sabo po olama, tama agai te elalubo bomo te menade sali po koneainu tiao, tama magi baso dago aga aiyaba elaluabo usu ebe. Tama tiyu, te dago aga nogo dunama, tama aga aiyaba elaluaibao. Te nago te tama tebaso da, teda da deli deligo te mone 1,100 mone silva nage mawaibao,” wali.

⁶Tama tibaso, Delailago Samsonbolo te po walali, “Te magi baso nago te tiwai genuai bomo elalubowe? Te po enabolo walao. Tama bidi me deligo te nage nogo dunama, tama nage aiyaba elaluainu ebaso da, te agai mena tama tiwai sę yaibawe?” wali.

⁷Tama Samsongo agabolo te tiwai po walali, “Te ena augwaligo te enesigi balibi dolobo bono keloa te a naga te me si te tamago te ena nogo dubaso da, teda te eno bomo sia saibao. Tama ena te tigidali gasa bidi tiwai naga yaibao,” wali.

⁸Tama me sogo nosali te Filistia dabe tobolu bidigo te gesi enesigi balibi dolobo bono keloa te a naga me si tama selama, tama augwaligo te we Delailabolo magasali. Tama agai Samson te bono keloa dabe nogo dunama elaluali.

⁹Tialima, agai te bidi mebabolo po walama, te augwali gasa be habu badu tonalua po wali. Tama agai i weyu, “Samson, dua dao! Te Filistia dabe megi da asobao!” Tiali goli, agai te kę yani bono keloa dabe toga sąyu, te ugwa hobolobo hobi te siago ulubo sogo te togobo tiwai yali. Tama augwaligo agai te bomo ebo po page te me konesiąwai dao.

¹⁰Tama Delailago Samsonbolo po wali, “Odao! Nago enabolo te tibo po wabo sę naga eyu, te ena pomonani. Tiali goli, megi nago enaba po dolo weyu, te bidi dabego nage mena tama tilama te bono kę yabo po waibawe?” wali.

¹¹Tialima, Samsongo agabolo walali, “Te augwaligo ena te gesi baklain mugo, te augwaligo polobadu magi sę me isiąwaigo te ena kę ebaso da, teda eno bomo elalubo te sia selama, tama ena te olo gasa bidi dabe tiwai naga yaibao.” Te po wai.

¹²Tama tibaso, Delailago te gesi bono baklain meba selama, tama aga kęnani. Tama agai i weyu, “Samson, dua dao!” wali. “Te Filistia dabe asobao!” Tama te bidi meba te gasa be habu badu ma tonaluali. Tiali goli, Samsongo te bono baklain dabe tologa sąwani, te olo hobi tiwai naga ilali.