Qiata Vaiintinavu 16:2-12

²Mintumanta Gasaqi vauka iruvaro Samsoniva viraqi vaumanta vika vaantaavura qenti vaunaini vaara autute vira veka vaura. Vika tiha, Aatitairaro viva aniraqe tenavu vira arukaare, tivake evaara mini vaura.

³Vauvaro Samsoniva kia naavuqi vukaiqaakero vairaitiro, viva enta tavaara himpiro oru vaantaavura qenti utu varero vira nkaqukora. Viva qentive hini hini vau posirave, taurini kuvaito katarirave, nkaqukero nai kururuqaa aqu varero vuru inaara aiqina voqaa vatora. Vi aiqinara virivano Hebaroni mantaraini vaura.

⁴Vira naantiara Samsoniva vo nahenti vira autu Delailaarara voqama kero antuqa aruvaro vaura. Vi nahentiva Soreki Uqitaini vaura.

⁵Ho Pirisia avuhainaaka ˻5navu vauka˼ viva unaini orunte tiha, Nana haikavanoe Samsonira kahaqi vaivaro vira kempukavano uritara kero vaivo? Nantiakee tenavu vira kempuka taiqa kararave? Are Samsonirara uqerara uva tiraro viva vi uvara okara qoqaa ai tiva amirara irira tiva timiraqe tenavu vira aatarake rumpakaare. Are mintiraqe tenavu vohaiqa vohaiqavano 1,100 silvaa monu ai amiare, ti.

⁶Minti tuvaro Delailaava Samsonirara tiharo, Nana haikavanoe ai kahaqi vaivaro ai kempukavano uritara kero vaivo? Nantiakeroe vovano ai rumpatairaro ai kempukavano kia variarire?

⁷Minti tuvaro Samsoniva nai tiva amiro tiharo, Vika qaraaka hinta kia aaharaiqira viraqohai ti rumpata taivera, ti kempuka kia vairaqe te qaqi vaiinti voqaara vairarave, tura.

⁸Ho Pirisia avuhainaaka hinta 7navu kia aaharaiqura Delailaara amuvaro viva viraqohairo Samsonira rumpatora.

⁹Vo vaiintinavu rumu voqi kukeqavi vauvaro Delailaava naveraitiharo, Samsonio, veve, Pirisia ani variavo, tuvarovata, Samsoniva naaqunta tatoqavira hatoka kaintema kero, Samsoniva nai vaataqaa rumpataa hintara hatoka kora. Mintima komanta, vika Samsonira kempuka okarara kia kankomake irura.

¹⁰Delailaava Samsonirara tiharo, Mpo, are virera uva tiharama tiriara una uva tiaro. Mpo, nantiakeroe vovano ai ho rumpataanarove? Virara ti tiva timiraqe iriare, tiro.

¹¹Minti tuvaro viva tiharo, Vika qaraaka naaqunta nora kia vo kaiqa varera viraqohai ti rumpataivera, ti kempuka kia vairaqe te qaqi vaiinti voqaara vairarave, tiro.

¹²Minti tuvaro Delailaava qaraaka naaqunta vonavu varakero vira rumpatora. Vaiinti vonavu vo rumuqi kukeqavi vauvaro viva naveraitiharo, Samsonio, veve, Pirisia ani variavo, tuvaro viva tavuna naaqunta hatoka kaintema kero nora naaqunta hatoka kora.