Taiya dle so 23:26-34

²⁶“Namkale gamani oplami Peliks, na꞉ye Kolodiyas Lusiyaspo.

²⁷Yu sotapo oplami iye hamame yumuluwedeme apuwa. Amasiyama ya꞉ye Loum mo oplami ikadepe dle dalepame na꞉ mate epo na꞉ opa mate ya꞉ye hemele hatiyomoluwa.

²⁸Epame na꞉ta ya꞉ koko dallowedeme Yu so dokopala so esemale dla semhetauwa.

²⁹Esemale edla na꞉ta ya꞉ta isikimi Yu so aiyalma hauwokokomale tlo dalepame ya꞉ye poyumina epo amtuwale aya dla poka꞉stana.

³⁰Epame Yu so opita oplami iye yumuluwedeme dinapele dalepame ya꞉ye wa꞉ watle semtaiya duwa. Epo na꞉ta Yu so opiye wa꞉ watle taiya dlowama, yia꞉ta ya꞉ dla alli kokoye wa꞉ watle atlamelepo depame. Eso, na꞉ yu mogudepo.”

³¹Epalati utula꞉la oloma edla opahale sota yia꞉ dokopala oplami yu dalepo Poloye Kasaliya dla semtamalemama api duka Antipatlis mo dla puame woyamaiyo.

³²Epame alallati aliya koa sota Poloye Kasaliya mo dla semtamalati opahale so opi ma Yelusalem dla i-ilapo tamalaiyo.

³³Aliya koa sota Kasaliya dla puame woyapame gamani oplami Peliks watle yia꞉ dokopala oplamita yu ilimale hamiyo. Epame Polo mape ya꞉ watle homeliyo.

³⁴Epalati gamani oplamita yu ilimale i sesa꞉pame Polo watle epo atlaiyo, “Wa꞉ apa mo oplamita꞉?” diyo. Amasiyama Polota ya꞉ watle atlemama, “Na꞉ Kilikiya mo dla hallalo,” dlati ya꞉ ma asiyama epo atlaiyo, “Na꞉ wa꞉ mate siyaladlalo sota pula natipame wa꞉ kokoye gladlowepo,” diyo. Epame ya꞉ opa watle “Poloye hamame tame Helod aya dla woloma omha꞉ha꞉iya,” diyo.