1Epapele dulu dla opa opi Yudiya tle Antiyoka dla puame po-Yu so mikadepe dle so watle imama epo atlaiyo, “Wua꞉ Mosesta di watle kapala kestlowe koko imuwaye, e podolumalalo wekelepiye, wua꞉ pasakalo hallowe pohalowa,” diyo.
2Epalati Polo mate Banabas mate imale i dalepame allimama yia꞉ mate yu dlomaiyo. Epapalati mikadepe dle sota Polo mate Banabas mate epo mikadepe dle so opi mate hohopo Yelusalem dla taiya diyo, yia꞉tapo tame Taiya dle so opa mate epo Yelusalem sos dokopala so mate koko iye woloma esemelepo depame.
3Yia꞉ sostapo yia꞉ye taiya dlati tamalemama Ponesiya mo tle epo Samaliya mo tle tamalaiyo. Edla tamalemama sos hapuloma dla po-Yu sota yia꞉ biskapa god melepame ma Yesu dla mikadepe dle kokoye atlamtamalaiyo. Epalati mikadepe dle so hapulomata koko i dalepame sikemte sisiyeiyo.
4Epapedeme yia꞉ta puame Yelusalem dla woyamalati sos dokopala so mate Taiya dle so mate epame mikadepe dle so hapulomata yia꞉ natipame sikemte sisiyeiyo. Epalati Polo mate Banabas mate Godta yia꞉ tle oko halë kokoye yia꞉ watle atlamaiyo.
5Amasiyama mikadepe dle so opa opi Pa꞉lisi so alumale dulu tle sillipame epo atlaiyo, “Po-Yu sota pasakalo gadle halowa dlepiye, yia꞉ ka꞉dena, kapala kotipo Mosesta aiyalma hatitimale dolumsiyamoloweye,” diyo.
6Epapalati Taiya dle so mate dokopala so mate yu i dulu kokoye woloma esemolowedeme hatlo alumaiyo.
7Alila selemalli dulu dla koko i esempopa꞉pame Pitata sila꞉time epo atlaiyo, “Namkadulo, wua꞉ malamaiya. Ka꞉yapa Godta wua꞉ dulu tle na꞉ye ma-hamuwapo, po-Yu so watle God yu hamtelepo depame. Epalati yia꞉tapo na꞉ tle God yu dalepame mikadepe duwapo.
8Epalati God opa dupa dulu natilalotapo po-Yu sota mikadepe dle koko i natipame ka꞉pi duwapo. Adipalati, ya꞉ta koko iye mikadepe demama ya꞉ Hela꞉dle Sokoye dia꞉ dla hamiwa epammama ma yia꞉ dla hamiwapo.
9Epedeme Godta natili dulu dla di Yu so mate epo po-Yu so mate pomeyelopedesema. Epapedeme yia꞉ta mikadepe dlati Godta yia꞉ bobtalimaleye mo-howahapo woweluwapo.
10Epedeme wua꞉ God elemala natimiya. Epame po-Yu so mikadepe dle soye Mosesta aiyalma hatitimale dolumelepo depame ha꞉ha꞉limiya. Wua꞉ta epapelepiye, wua꞉ta yia꞉ watle upiyele alisisi epapele some goludemama apelepe. Adipalati, dia꞉ mate epo di mamadulo mate woloma upiyele alisisi eye pohampuana.
11Amasiyama di mikadepe dema, di Lod Yesu di watle bokotiyapo malamale tle pasakalo hallowe hamiwaye, epammama po-Yu so mape api hatlo metle pasakalo hallowe halepe,” diyo.
12Epalati alumale patotapo Pita yu dalepame yu dimi popa꞉iyo. Epo yia꞉ta yu dimi popa꞉lati Polo mate Banabas mate Godta yia꞉ tle ulugiyemale koko po-Yu so dulu dla halomsiyamaleye yia꞉ dla atlamaiyo.
13Yia꞉ta yuhapo gudlati ma Yeimsta sila꞉time epo atlaiyo, “Namkadulo, na꞉ yu daliya.
14Saimon Pitata di watle ma-atlalepo, Godta ka꞉yapa po-Yu soye ya꞉ta bokotiyapo malamale tle ya꞉ akimlala depo hohomale kokoye.
15Epapedeme koko itapo God tle yu hapame molo atlalo sota atlamale yu mate ma-ala꞉po. Adipalati, God yu buka dla yu ilimaleta ipo elapo,
16‘Koko i gudlati na꞉ matle ilame puluwepo. Adipalati, Dokopala oplami Deibidita omhaluwa mo kokoye aya epapele some mo-kitlotame elapo. Amasiyama na꞉ta puame dinapopame mamisika꞉ halowepo.
17Epedeme na꞉ta sisilamale po-Yu so opa hapulomatapo na꞉ye totamelepe.
18Epapedeme opata koko i malamelepo depame Lodtapo mo-powataliya atluwapo.’
19Epapedeme na꞉ posolotamasema, dita po-Yu sota God hala dla puluwe api himomolloweye.
20Amasiyama di isikimi yu ilimale tlo po-Yu so watle hamimama epo atlowepo, ‘Wua꞉ biskapa god watle hamili dlowe alisisi halopo podlowa. Adipalati, dlowe alisisi eye mo-batalimalepo. Epame batalimale koko opa uhalomolowe mate wola꞉ uhalomolowe mate pohalomolowa. Epame omali podlowa, epammama mo ma ala omali mate hallati podlowa.’
21Epedeme po-Yu soye woloma koko i dolumha꞉ha꞉lowe ka꞉pi. Adipalati, mo-powataliya Yu sotapo mo hapuloma dulu dla yia꞉ inoma sumalalo aya dla ipapele kokoye halomiyo demama haliyamale dla ma-atlamduwapo. Epammama yia꞉tapo Mosesta aiyalma hatitimaleye inoma sumalalo alila hapuloma dla opa watle ma sesa꞉po imduwapo.”
22Epame Taiya dle so mate epo sos dokopala so mate epo mikadepe dle so hapuloma matetapo solotamale himpame opa opi hohopo Polo wolo mate ma Antiyoka dla taiya diyo. Epammama yia꞉ta dokopala so alumale dulu tle opa iwolo hohomaiyo, Yudas Balesabas mate Saeles mate.
23Epalati yia꞉ta yimkata Antiyoka dla tamalemama yu ilimale i hame tamalaiyo, “Epedeme namkadulo, di Taiya dle so mate epo sos dokopala so mate yu iye ilima. Epapedeme di yu iye po-Yu so mikadepe dle so hapuloma Antiyoka dla epo Siliya dla epo Kilikiya dla ha꞉ha꞉lalo so wua꞉ dla hamima.
24Epapedeme di alumale dulu tle opa opita tame wua꞉ dla yiyilamale koko imalati wua꞉ta sikemte momalamuwaye di me-daluwa. Amasiyama dita yia꞉ watle atlati po-apena.
25Epapedeme di ma Polo mate Banabas mate ma ilame wua꞉ dla taiya dema. Adipalati, opa iwoloye Lod Yesu Keliso koko dla yia꞉ pasakalo hatitimoloweye po-allisemde. Epele dulu dla dita solotamale tle di alumale dulu dla Yudas mate Saeles mate hohomuwa, yia꞉ta Polo wolo mate wua꞉ hala dla telepo depame. Epedeme yia꞉tapo wua꞉ dla tame yu hatlo dita ilimale iye atlamelepe.
28Adipalati, di Hela꞉dle Soko mate malamale ma-hatlope depo himiwapo. Epedeme di wua꞉ watle upiyele hale pohamilowa. Amasiyama wua꞉ isikimi koko hatlo itlo dolumaiya.
29Wua꞉ biskapa god watle hapili dlowe alisisi halopo podlowa. Epame omali podlowa, epammama mo ala omali mate hallati podlowa. Epame batalimale koko wola꞉ uhalowe epo opa uhalowe mate pohalomolowa. Wua꞉ta di yu i dolumha꞉ha꞉lepiye, eta wua꞉ye ka꞉depo ha꞉ha꞉lepe. Eso namkadulo, di yu epo.”
30Epedeme opa iwolota yu ilimale i hame Yelusalem tle Antiyoka dla ma-tamalaiyo. Epame yia꞉ Antiyoka dla puame woyapame opa hapuloma sisilapame yu ilimaleye yia꞉ watle hamiyo.
31Epalati Antiyoka sos sotapo gadle yu ilimale i sesa꞉pame sikemte sisiyeiyo.
32Epame God tle yu hapame molo atlalo so Yudas mate Saeles mate gadle yu atlamama mikadepe dle so dla itiyamale hamiyo.
33Epame alila opi Antiyoka dla ha꞉ha꞉po gudlati mikadepe dle sota Yudas mate Saeles mate ma Yelusalem dla woloma i-ilapo taiye diyo.
34Amasiyama yia꞉tapo ilame ma-tamallati asiyama Saeles tlo Antiyoka medla halli diyo.
35Epalati Polo mate Banabas mate Antiyoka mo dla me-ha꞉ha꞉mama opa opi mate God yu atlamha꞉ha꞉iyo.
36Alotle alila haleta Polotapo Banabas watle epo atlaiyo, “Di matle ilame tame dita ka꞉yapa Lod yu hamtauwa mo yimlala hapulomaye tlamtlowa. Adipalati, na꞉ edla mikadepe dle so ha꞉ha꞉ye sikemte malamama yia꞉ tame natilowe solotama,” diyo.
37Epalati Banabasta solotamaiyo, Yon Makaye ya꞉ta semtlowedeme.
38Amasiyama Polo posolotamaiyo, Banabasta Yon Maka semtloweye. Adipalati, yia꞉ta ka꞉yapa tale dulu dla Yon Makaye hamalati ya꞉ta oko dla hutulli woloma ponatiyo. Epapele koko tle Yon Makatapo yia꞉ye Pampiliya mo tle saliyome ilamtaiyo.
39Epalati Polo mate Banabas mate sikemte yu dlopo yimkata siyamale tle duka gladepo ma meyelope meyelope depo tamalaiyo. Epammama Banabasta Yon Maka seme Saiples hasu dla koa tle uliyo.
40Epalati asiyama Polota Saeles tlo saiyo, ya꞉ mate tloweye. Epalati mikadepe dle sota yia꞉ye taiya demama epo atlaiyo, “Taiya, Lodta gadletapo wua꞉ mate hallepe,” diyo.
41Epapalati yia꞉ta tame Siliya mo mate epo Kilikiya mo mate dla mikadepe dle soye God yu mate gagademsiyamama itiyamale hapimsiyamaiyo.
