Acts 23:26-34

²⁶Tau Claudius Lisias, a girugiruma awarim au bada vinualaulaunam, Gavena Felix. Egualau.

²⁷Mai Jew wei orotona i vojijini ma ita viraḡeni, wate maranai a nonori da tauna Rome-ei ma lamna aubaina au sorodia maiteni a opu da au urai a vaitawanei.

²⁸A ḡoei da ata aramanei ana apoapoe aiwai, da ata naiei ai Boru ḡeḡetelerana awarina.

²⁹Ma a nelaḡai da viwavuna lamna tauiava ai tumaḡana kauai ma Rome ana tarawatuei lamna tauna eḡa aiwai apoapoena ita kauei da ata viraḡeni bo ata pani.

³⁰Maranai riwana a vaia da mai Jew i ḡoei da govagovaḡanei tauna ita vunui. Lamna maratagogi a paritawanei awarim, ma nanare tauviwavu a riwana-guratei da kampa ina ḡetai da ai viwavu ina kauei.

³¹Ma sorodia ai babada i ririweia nanare i kauei ma waguvarai Paul i taravaini ma i naiei da au taon Antipatris i ḡeta.

³²Au maratomna aiera ma sod sorodiai i naeme au Jerusalem ma hosi sorodia Paul i naei au Caesarea.

³³Maranai hosi sorodiai au Caesarea i ḡeta pepana ma Paul gavena i veredamanei au urana.

³⁴Gavena pepa i ʼavi ma Paul i paridadanei metauna provins-na u tupua ma i riwa, “Silisia.”