Taha Bapare Sâcmutâc 24:13-23

¹³Eme Wofuŋzi Mose kecʒiŋuc âzâcnewec:

¹⁴“Ŋic sâwecdâŋ muwec e mutec teuŋkonec jowa wahanʒepieŋ, ehame sâwecdâŋ mume manambiŋ jaŋe mejeŋic qizecnao râehapie kikefuŋ sasawa jaŋe qânâzi hehâmonʒepieŋ.

¹⁵Erâ Israe ŋic ʒiŋuc jazazemec: Moc e Anutu musoriŋkeocmu e kiŋsâko hureocmu.

¹⁶Moc e Wofuŋte ʒâŋe musoriŋkeocmu e qâhâmonʒepieŋ; kikefuŋ sasawa jaŋe qânâzi hehâmonʒepieŋ. Ŋic jabane mecne mâreŋ rune mecne Wofuŋte ʒâŋe musoriŋkepie qâhâmoc‐jopanʒepieŋ.

¹⁷Moc e ŋic moc qâhâmome okacne qâhâmonʒepieŋ wâc.

¹⁸Â moc e qowi moc qâhâmoocmu e okacne râerâ juzejec.

¹⁹Me ŋic moczi âgo‐ticnere sahac sipirickeocmu e ine âgo‐ticne ecnewec sâc ijaha ecnezo.

²⁰Me kikene qazume okacne ere wâc qazuzo, ʒâŋene âke hâpome okacne ere wâc âke hâpozo, me micsiecne hezume okacne ere wâc hezuzo. E âgo‐ticne ba imac ecnewec sâc ijaha ecnezo.

²¹Moc e qowi qâhâmoocmu e okacne râezejec â moc e ŋic moc qâhâmoocmu e wâc qâhâmonʒepieŋ.

²²Ŋic jabane mecne mâreŋ rune mecne jaŋere sâcmutâc dâŋ i mocjaha fozejec. Noni hâcne Wofuŋ Anutu‐ŋeŋic.”

²³Mose e Israe ŋic dâŋ iŋuc hâcne jazawec, ehame jaŋe sâwecdâŋ muwec ŋic e ecnepie teuŋkonec wahame qânâzi hehâmombiŋ. Iŋuc ehuc Israe ŋic jaŋe Wofuŋzi Mose dâŋ mutâcnecnewec irec sâcko embiŋ.