Levi 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹E BAKOVI DAGI i taki tabua e Moses, “Na tahuna a bakovi tara i ngaru ni habi ne BAKOVI DAGI ranga vit, ge vila tala a kulina vit, ge bole a kanena, ge rata a plaoa kamumu. Ge guru langa vona a namona oliv, a havu mangisipa.

²Muri ge bole a maki nga ge lakea ne huriki e tune Aron, re huriki a prister. A prister tara ge ragamu tala na limana ranga plaoa kamumu, turana a namona oliv, a havu mangisipa. Muri ge habi na prister ge gutu langa na dede, ge a nihabi ni gutu na kanono. A nihabi iea ge ratea e BAKOVI DAGI ge luhoia. Na tahuna e BAKOVI DAGI i burongia a mangina kinani, bara i vivi.

³A maka nihabi na vit i tababana ni gi habi ne Aron turane huriki e tuna bakovi, ra nihabi iea, a nihabi ni gutu na kanono ni taba ne vona e BAKOVI DAGI.

⁴“Mua bara mu ngaru ni gutu a bret na oven ge a nihabi, naha ni vuli turana a is. Mu bole a plaoa kamumu mu vuli turana a namona oliv, mu rata a bret, ge a nihabi. Mua mu marikoi ni rata a bret, mu rata a bisket ge i uka is, mu ravu na namona oliv.

⁵Mua bara mu ngaru ni nono a plaoa na ulo kabelabela ge a nihabi, mu bole a plaoa kamumu ge uka is, mu vuli turana a namona oliv, mu gutu.

⁶Mu pua a bret ge momo, mu guru langa vona a namona oliv, ge a nihabi na vit.

⁷Mua bara mu rata a bret ge a nihabi, mu gutu na ulo, mu bole a plaoa kamumu, mu vuli turana a namona oliv.

⁸Mu bolea a nihabi na vit, mu rata a maki nga, mu taparaki lakea na prister ge bole lakea na dede, ge habi ne BAKOVI DAGI.

⁹Muri a prister ge bole tala na nihabi na vit a tabekena popote, a maki iea ge ratea e BAKOVI DAGI ge luhoia. Ge gutu na dede, ge a nihabi ni gutu na kanono. Na tahuna e BAKOVI DAGI i burongia a mangina kinani, bara i vivi.

¹⁰A maka nihabi na vit i tababana ni gi habi ne Aron turane huriki e tuna bakovi, ra nihabi iea, a nihabi ni gutu na kanono ni taba ne vona e BAKOVI DAGI.

¹¹“Naha ni vuli a is turana plaoa ge a nihabi na vit ne BAKOVI DAGI, a vuhuna i uka ma go gutu a is, a ame na nihabi go habi ne BAKOVI DAGI na kanono.

¹²Ioe bara o ngaru, o vuli a is, a ame turana a maki i moro muga na hania, ge a nihabi ne BAKOVI DAGI, pali naha ni gutu na dede ge huli manginoro a mangina.

¹³A maka nihabi lobo na vit, ni gi ru a mami vona. Naha ni longokaburungi ni ru a mami na maka nihabi ne mua, a vuhuna a mami a kilakila na ngava dagi mu rata turana Vure. Mu ru a mami na maka nihabi lobo.

¹⁴“Mua bara mu habi ne BAKOVI DAGI a vit i moro muga na hania, mu tutu, mu gutu na kanono, muri mu habi vona.

¹⁵Mu bole a namona oliv, a havu mangisipa mu guru langa na maka vit, ge a nihabi na vit.

¹⁶A prister ge bole tala a vit popote, a namona oliv, turana a maka havu mangisipa, a maki nga ge ratea e BAKOVI DAGI ge luhoia, ge a nihabi ni gutu na kanono lakea vona.”