Soukapwüng 8:3-14

³Kot a fangelong lepöümi ekewe samolun Mitian iter Orep me Seep. Met ngang üa tongeni föri epwe fen nönnö ngeni mine ämi oua föri?” Mürin an üreniir ekei kapas, ar song a kisikisitiu.

⁴Iwe, Kition me ekewe ülüpükü mwän mi eti ra tori ewe chanpupu Jortan o pwerela pekilan. Ra malülü, nge ra chök tapweriir.

⁵Lupwen ra tori Sukot, Kition a üreni mwänin ewe telinimw, “Ouse mochen oupwe ngeni nei kei sounfiu ekoch fochun pilawa. Ra fokun malülü, nge ngang üa chüen mochen tapweri ekewe kingen Mitian iter Sepa me Salmuna.”

⁶Nge ekewe meilapen Sukot ra apasa, “Ifa usun, ka fen liapeni Sepa me Salmuna, ina äm aipwe wisen ngeni noum kewe sounfiu pilawa?”

⁷Mürin, Kition a üreniir, “Iwe, ina. Lupwen ewe Samol mi Lapalap epwe mwüt ngeniei pwe üpwe liapeni Sepa me Salmuna, üpwe atatakisi fitukemi ngeni ekewe iräfölüföl seni lon fanüapö, pwal ngeni ekewe nikouloul.”

⁸Iwe, seni ikenan Kition a feitä Penuel o kapas ngeni ekewe re Penuel ekewe chök kapas. Nge ir ra pwal pälüeni usun chök än ekewe re Sukot pälüen.

⁹Iei mine Kition a üreni ekewe re Penuel, “Lupwen üpwe liwinto fän kinamwe, üpwe atai ei imw tekia.”

¹⁰Iwe, Sepa me Salmuna ra nom Karkor ren nöür sounfiu, ina epwe ükükün engol me limungeröü mwän, ikkei ir lusun ewe mwichen sounfiu seni ötiu. Pun ra mäla ükükün ipükü rüe ngeröü sounfiu mi sile maun won ketilas.

¹¹Iwe, Kition a feitä won alen ekewe aramas mi imweimw lon imw mangaku peliötiuen Nopa me Jokpeha o maun ngeni ekewe sounfiu, lupwen ra tümwününgauela.

¹²Iwe, Sepa me Salmuna ekewe kingen Mitian ra sü. Nge Kition a tapweriir o liapeniir, a pwal fokun aniuokusu nöür kewe sounfiu pwe ra toropasfeil.

¹³Mürin, Kition nöün Joas we mwän a liwinto seni maun me won palen Heres.

¹⁴Iwe, a liapeni eman alüalün Sukot o aisini iten ekewe meilap me souakomwen Sukot. Iwe, ewe alüal a makeetiu iten fik me füman mwän.