Soũↄ 89:17-49 - Bibeli Luayãtaalá

Soũↄ 89:17-49

Click on verse(s) to share them!

¹⁷Aaìↄ pↄnakɛ ń n tↄ́o gↄↄpii, aaì ĩ́anadã ń n maakɛao.

¹⁸Asa an gawi ń ń gbãaon n ũ, n zɛawanↄ yã́i wá mi daa ía.

¹⁹Wá sɛ̀ngbaoá Dii pↄ́ɛ, wá kíapiá wá Isailiↄ Lua pↄ́ɛ.

²⁰N yã'ò n yãmanaↄnɛ yãa wɛ́pungu'ea guu n mɛ̀: Ma dↄnlɛkɛ̀ nɛgↄ̃naɛ, ma ɛ̀waasopi sɛ̀ lɛsĩ a gbɛ̃́ↄ guu.

²¹Ma a zↄ̀blena Davidi è, ma a nísikàwà ma aà dìlɛ.

²²Máↄ aà kũa ma ↄzĩɛ, ma gã̀sa gbãa aↄ kuaànↄ.

²³Ibɛɛ a fↄ̃ falusiwào, gbɛ̃vãi a e ↄnaalɛwào.

²⁴Má aà wɛ̀lɛↄ wíwi aà aɛ, má aà zangudeↄ kwɛ́.

²⁵Máↄ náai vĩɛ̀ ń gbɛ̃kɛo, aà mi iↄ daa ía ń ma tↄ́o.

²⁶Má ísia naɛ̀ a ↄzĩɛ, iↄ iko vĩ swaↄwa.

²⁷A lɛzumazi à mɛ, má dɛ a Mae ń a Luao ũ, a gbɛsi ń a Suabanao ũ.

²⁸Má aà kɛ ma yoa ũ, iↄ dɛ dṹnia kíaↄ mide ũ.

²⁹Máↄ gbɛ̃kɛ vĩaànↄ gↄↄpiiɛ, ma bàa pↄ́ kuaànↄ gbooa vĩo.

³⁰Má tó aà bui àↄ kible gↄↄpiiɛ, aà kpala iↄ ku e dṹnia gɛ láaò.

³¹Tó aà buiↄ pãkpà ma ikoyãi, mɛ́ aai tɛ ma yãdilɛaↄzio,

³²tó aa bↄ̀ ma yã́ kpɛ, mɛ́ aa ma yãdanɛↄ kũao,

³³má gotↄ̃má an tàaeↄ yã́iɛ, mí ń kɛ búubuu an vãi yã́ musu,

³⁴ãma gbɛ̃kɛ pↄ́ má vĩaànↄ a midɛo, má fↄ̃ náaisaiyãkɛo.

³⁵Má a bàa pↄ́ kuaànↄ yã́ gbooo, má lɛ́ pↄ́ má gbɛ̃̀ɛ̀ lilɛo.

³⁶Ma lɛgbɛ̃̀ ń mazĩa kuao gɛ̃n do, má ɛɛto Davidiɛo, ma mɛ̀,

³⁷aà bui aↄ ku gↄↄpiiɛ, aà kpala aↄ ku ma aɛ lán ĩatɛ̃wa.

³⁸Lá mↄvua dɛ seela náaide ũ musu, màa aà kpala aↄ ku gↄↄpii.

³⁹Ń beeo n gi kía pↄ́ ń kpài, n ↄkpàaàzi, n kolokɛ̀aànↄ.

⁴⁰N n bàa kua ń n zↄ̀blenao yã́ gbòo, n sakà aà kíafuau, ń zù zĩ́lɛ.

⁴¹N aà wɛ̃́lɛ bĩ́iↄ gbòo, n aà zɛgikĩiↄ kwɛ̀ ń dàaĩ.

⁴²Gɛ̃zɛadeↄ lɛ́ ń baa sɛu, à gↄ̃̀ láanipↄ ũ a saɛdeↄnɛ.

⁴³Ń tò aà wɛ̀lɛↄ gã gbã̀ɛ, ń tò aà ibɛɛↄ pↄnakɛ̀.

⁴⁴N aà fɛ̃nda lɛ́ dɛ̀, ni zɛaànↄ zĩ guuo.

⁴⁵N aà gawi kↄ'ɛ̀, n aà báa bↄ̀aàla.

⁴⁶Ń tò à zikũ̀ a gbãau, n widàwà.

⁴⁷Dii, ńyↄ̃ↄ ulɛawɛ̃ɛ gↄↄpii yã̀? N pↄkũma tɛ́ aↄ kũ e bↄɛ ni?

⁴⁸Làasookɛ ma wɛ̃ni kulunkɛwa, n gbɛ̃nazĩna kɛ̀ pã yã̀?

⁴⁹Gↄ̃sa kpele mɛ́ aↄ ku à gí gaii? Démɛ a fↄ̃ azĩa si mia ikowai?