Soũↄ 71:9-24

⁹Ńsu pãkpamazi ma zikũa yã́io, ńsu ma vũaa ma gbãa láaa yã́io.

¹⁰Asa ma ibɛɛↄ lɛ́ ma yã'o, ma wɛ̀lɛↄ lɛ́ lɛkpaaĩ ma wɛ̃nibↄai.

¹¹Aa mɛ̀: Lua gìaàziɛ, wà aà ya kṹ, gbɛ̃e ku à aà suabao.

¹²Lua, ńsu ǹyↄ̃ kumanↄ zã̀o, ma Lua, kɛ kpakpa mↄ dↄmalɛ.

¹³To wí gbɛ̃́ pↄ́ lɛ́ yãdↄaↄ kṹ, aa midɛ, to sↄ̃́sↄ̃a da gbɛ̃́ pↄ́ lɛ́ ĩadaaↄla, an tↄ́ ↄ̃̀ↄkpa.

¹⁴Mapi sↄ̃, ma wɛ́ ìↄ dↄnzi láasaiɛ, miↄ n táasilɛ màↄ gɛ́.

¹⁵N maakɛa aↄ dↄ ma lɛ́u gↄↄpiiɛ ń n gbɛ̃suabaa pↄ́ má a lɛ́ dↄ̃oo.

¹⁶Má mↄ mà Dii Lua gↄ̃sakɛyãↄ galikɛ, n mɛ̀ndo maakɛa má dↄ gbɛ̃́ↄgu.

¹⁷N yãdàdamɛɛ za ma ɛ̀waasogↄↄ, Lua, e tia málɛ n yãbↄnsaɛↄ o'o.

¹⁸Baa kɛ́ ma zikũ̀, ma mikã pua, ńsu ma to weo, Lua, kɛ́ mà e n gbãa galikɛ tiadeↄnɛ, mí n gↄ̃sakɛyã dau siu gbɛ̃́ pↄ́ aalɛ fɛlɛↄnɛ.

¹⁹Lua, n maakɛa zↄ̃̀ma, n yãzↄ̃ↄkɛ̀, démɛ muaannↄi?

²⁰Ń tò taasi pãsĩ ma le dasidasi, ãma ńyↄ̃ ɛa ǹ ma gba wɛ̃ni, ńyↄ̃ ɛa ǹ ma bↄ tↄↄlɛ nↄnau.

²¹Ńyↄ̃ ma bɛɛɛ kã́fĩmɛɛ, ńyↄ̃ ɛa ma nↄ̀sɛ nínimɛɛ lↄ.

²²Ma Lua, má n sáaukpa ń mↄↄnao n náai yã́i. Isailiↄ Lua pↄ́ n kua adoa, má n táasilɛ ń kúuo.

²³Gula aↄ dↄ ma lɛ́u. Ma gbɛ̃́ pↄ́ n ma mìsi, má n táasilɛ.

²⁴Máↄ n maakɛa o gↄↄpiiɛ, asa wí gbɛ̃́ pↄ́ lɛ́ ma vãi wɛɛlɛↄ kũ̀, an gɛɛ gↄ̃̀ kpá ń wɛ́i.