ZABURA 71:9-24

⁹Ǹsun pã kpámai ma zĩkũkɛna yãiro, ǹsun ma zukũna ma gbãna lakana yãiro.

¹⁰Zaakũ ma ibɛrɛnↄ tɛni ma pi, ma wɛtɛrinↄ tɛn lɛ́ kpákũsũmai ma wɛ̃̀ndi bona yãi.

¹¹Ò pì: Luda gìimɛ, ò pɛ́a ò kũ, gbɛ̃ke kun kũ à a sura baro.

¹²Luda, ǹsungↄ̃ kú kũmao zã̀ro, ma Luda, ǹ kɛ likalika ǹ mↄ́ ǹ kpámai.

¹³Ǹ tó wé'i gbɛ̃ kũ òtɛn yã dimanↄ kũ de ò kakatɛ, ǹ tó sↄ̃sↄ̃na da gbɛ̃ kũ òtɛn wɛ́ tãmanↄla de ń tↄ́ yaka.

¹⁴Makũ sↄ̃, ma wɛ́ nigↄ̃ dↄnyĩ, manigↄ̃ n táaki lɛ́ màgↄ̃ gɛ́.

¹⁵N manakɛna nigↄ̃ da ma lɛ́n gↄrↄ sĩnda pínki kũ n surabana kũ má a lɛ́ dↄ̃roo.

¹⁶Mani su mà n zↄ̃kↄ̃kɛyãnↄ o Dikiri Luda n mɛ̀n do manakɛn mani da gbɛ̃nↄnɛ.

¹⁷N yã dàmɛnɛ zaa ma kɛfɛnnakɛgↄrↄa, Luda, ari tera matɛni n yãbonsarɛnↄ o'o.

¹⁸Bee kũ ma zĩ kũ̀, ma mìkã pura, ǹsun ma tónlo, Luda, de mà le mà n gbãna baba teradenↄnɛ, mà n gbãnakɛyã da gbɛ̃ kũ òtɛn futɛnↄnɛ ń pínki.

¹⁹Luda, n manakɛnaa zↄ̃̀ susunɛnↄa, n yã zↄ̃kↄ̃ↄ kɛ̀, dín oni lɛkↄ̃a kũnwoo?

²⁰N tò wari pãsĩ ma le dasidasi, ama ĩni ɛra ǹ ma gba wɛ̃̀ndii dↄ, ĩni ɛra ǹ ma bo zĩtɛ.

²¹Ĩni ma bɛ̀ɛrɛ karamɛnɛ, ĩni ɛra ǹ ma laakari kpátɛmɛnɛ dↄ.

²²Ma Luda, mani n sáabu kpá kũ mↄrↄↄo n náani yãi. Isarailanↄ Luda kũ ń kú adona, mani n táaki lɛ́ kũ gidigboo.

²³Ayuwii nigↄ̃ dↄ ma lɛ́n, makũ kũ n ma mìi sì mani n táaki lɛ́.

²⁴Manigↄ̃ n manakɛna o gↄrↄ sĩnda pínki, zaakũ wé'i gbɛ̃ kũ ò ma wɛtɛ kũ vãnionↄ kũ̀, ò gↄ̃̀ bídi gũn.