Soloumane ea Gesami 1:6-16

⁶Na gadofo da bunumaiba:le, dilia na mae higama. Bai na gadofo da esoga gia:le, bunumai. Lolalali da nama ougiba:le, na waini efe bugiga hawa: hamoma:ne asunasi. Na da nina: da:i ouligimu eso hame ba:i.

⁷Na dogolegei! Nama adoma! Di da dia sibi wa:i gisi moma:ne habidili oule masa:bela:? Ilia da dogoa eso gia:sea, habidili helefima:bela:? Na da laluba:le sibi ouligisu eno ilia sibi wa:i ganodini, di hogoma:bela:?” Dunu da amane sia:i,

⁸“Di, uda eno ilia noga:idafa ba:su hou baligisu uda! Di da na esalebe sogebi hame dawa:bela:? Di asili, sibi wa:i amo fa:no bobogema. Dia goudi da gisi moma:ne, gisi sogebi amo sibi ouligisu dunu ilia abula diasu gadenene hogoma.

⁹Na dogolegei! Felou ea sa:liode hiougisu hosi gawali ilia da hosi aseme ba:sea, hanasa, amo defele, dunu da di ba:sea, hanasa.

¹⁰Dia dialuma hinabo da dia ba: dialebe, noga:i ba:sa. Amola dia dialuma hinabo da dia mugi da:iya dugisi da nina: hamosu igi agoai ba:sa.

¹¹Be ninia da dia gisa:gima:ne, gouli sia:ine amoga silifa nina: hamoi liligi gala, amo hamomu.” Uda da amane sia:i,

¹²“Na hina bagade da ea fafai da:iya dialu. Na da gabusiga: manoma legeiba:le, hisi da gabusiga: amoga nabai ba:i.

¹³Na sasagesu dunu da ‘me’ gabusiga: galebe agoane naba. E da na dodo da:iya diala.

¹⁴Na sasagesu dunu da soge ale ifa mosoi amo da Enegidai moilai waini efe sagai ganodini falegasa, agoane ba:sa.” Dunu da amane sia:i,

¹⁵“Na dogolegei! Di da noga:idafa ba:sa! Di da nama sasagele ba:beba:le, dia si da nenemei ba:sa.” Uda da amane sia:i,

¹⁶“Na dogolegei! Di amola da noga:idafa ba:sa! Di da nama hahawane hamosa! Golofoia:i gisi da ania golasu hamomu.