San Juan 10:3-31

³Pɨjta iztumikane pɨjta chɨhtu, pɨriku izmumika napnapa. Pɨrikune us parɨka piankam kit mɨamtu. Usne pɨrikuwa mun akwanat kit pɨriku wakis ukkanamtu.

⁴Paiña pɨrikuruza puzninarawane, usne uspa purakin an ñancha ɨmtu, mi anna. Pɨrikune ussa kanpaamtu, paiña pit piankamamtu akwa.

⁵Uspane pianchiruza kanpaamtuchi. Katmizna uspane suntuztas ɨamtu, mamazpa pit pianchi akwa.”

⁶Jesús sun kamtam kwinta kinarakas, uspane us kamtanara aizpa mɨarachi.

⁷Suasne Jesúsne mamasa kaiznara: “Watcha kaiznamtus. Nane pɨjtakana ish, pɨriku nappanapa.

⁸Na iztakin attuzne walkumtuzkas awaruza kwail kiashimturuzkas mai. Pɨrikuruzne uspa pit mɨashitchi.

⁹Nane pɨrikuwa pɨjtakana ish. Nawa saptumikane, nawa nɨjkultumikane, sun pɨjtakinkana napshina. Nane ussa sɨnam sanash. Usne pɨrikukanain nap kit puz kit chiwazha we aizpa mɨjanazi.

¹⁰Walkummikane amtu, walkwan, piantana, wan azpianna. Nain arau, uruza uzninnanapa, chinkas wenamanpa.

¹¹Nane wat pɨriku izmumika ish. Wat pɨriku izmumikane pɨriku akwa ishina, usparuza watsat mɨlnana.

¹²Diablo kwiza akane, kana kimtu mikane, pial sapmumikane, pɨrikura chɨhkanat kit ãĩn ɨmtu, us pɨriku izmumika chi akwa, pɨriku paiña chi akwa. Suasne Diablo kwizane pɨrikuruza piznat kit paimpa paimpa ɨninnamtu.

¹³Pialmin pashit akwa, an ampune pɨrikuras ãĩn ɨmtu. Usne pɨrikuruza wat izshimtuchi.

¹⁴Nane wat pɨriku izmumikakana ish. Pɨrikuruzne nawa nɨjkulamturuz mai. Ap Taittane nawa pian. Kawarain Taittara pianish. Sunkanain pɨrikuruza, nawa nɨjkulturuza pianish. Kawarain uspane nawa pian. Nakas uspa akwa ishinas, usparuza sɨnam sanana.

¹⁶Mamaztuzne, sun Judío chi awaruzne, nawa nɨjkulamtuchi. Nane usparuzakas karatpaish, na kaizta aizpa mɨanapa. Nane wan nawa nɨjkultuza maza kwain wanmakninnanash. Suasne nane, pɨriku izmumikane, usparuza iznanazi, nawa nɨjkularɨt akwa.

¹⁷Na mamaztuz akwa imtu akwa, ap Taittane nawa pashimtu. Usne nawa mamasa uznninnazi.

¹⁸Mɨnminkas nawa inintuchi. Nane nain chɨhkashimtus, inna. Nakas nawain kuhsshinas, mamasa uzna. Ap Taittane nawa ɨninta, sun kinpa.”

¹⁹Judío awa ɨninturuz us kaizta aizpa mɨarawane, uspane usparuzpain paimpa ɨara.

²⁰Akkwanne kaizara: “Salizne ussa pizta. Nukku paramtu. ¿Chitma us kaiztu aizpa mɨamtu?”

²¹Mamaztuzne kaizara: “Mɨnminkas, sun kwail saliz piztɨtmikane, sunkana parasachi.” Saliz piztɨtmikane izsachimikasha izkulninsachi.

²²Alu kimtu akwa, Jerusalén pɨpulura tɨh pamtu. Judío awaruzne Dios katsa yalpa pishta iznara.

²³Jesúsne Dios katsa yalkin Salomónpa pɨjtawara chamtazi.

²⁴Judío awa ɨninturuz ussa pɨlzarawane, uspane mɨmaara: —¿Yawa payukima tɨrizish, aumɨza nil kainarachin? Nu watsat mɨlmumika kane, nil kainachain.

²⁵Jesúsne sɨnkanara: —Me ñamin uruza kainarɨt. Une na kaizta aizpa nɨjkularachi. Ap Taitta nawa ɨninta akwa, nane us nawa kaizta aizpa kimtus. Na kirɨt aizpa izamtune, une nawa piankamashina.

²⁶U ap pɨrikukana chi akwa, une nawa nɨjkulamtuchi.

²⁷Ap pɨrikuruzne, nawa nɨjkulturuzne, ap pit mɨat kit nawa kanpaamtu. Nane usparuza pianish.

²⁸Nane pailta payukima usparuza uzninnamtus, mizurainkas kaamanpa. Mɨnminkas usparuza nakis nakamanazi.

²⁹Ap Taittane, nawa suntuza chɨhkarɨtmikane, mamazkinkas anza katsa i. Mɨnminkas usparuza ap Taittaras nakasachi.

³⁰Ap Taittakas nakas sulmin was.

³¹Suasne mamasa Judío awa ɨninturuzne uk chak kit Jesústa kishiamɨzta.