Juan 10:3-31

³Od lukatan sikandin to tohodbantoy to sobbangan woy dos mgo karnero, od pominog to bawos taddot id tamong kandan. Od umawon din iddos ngaran taddot mgo karnero rin woy od tinundug dan kandin nod poleggua.

⁴Otid pokoleggua ran don langun, sikandin kos od unna kandan woy dos mgo karnero, od ikuu kandin, oyyos nokilaa ran man iddos bawos din.

⁵Iddon mgo karnero, diid ikuu to osson minuvu no waa ran nokilaa, ko konna, od pomaahuy ra en baling sikandan, oyyos waa ran man nokilaa iddos bawos din.”

⁶Id ituu ni Disas kandan inin ponunggelengan, piru waa sikandan nokaabbot to kohulugan ka‑ay.

⁷De‑en mid ikahi mandon si Disas to, “Bonnaavonnaa nod ikohiyon ku koniyu, no siyak kos sobbangan nod ukitan to mgo karnero.

⁸Dos id undini no noko‑unna koddi no mid nonaw to uhus, sikandan iddos mgo tokawon woy tulisan, piru waa en id pominog kandan iddos mgo karnero.

⁹Siyak kos sobbangan. Dos ahad ondoy nod usok ukit koddi, od kotobbus en. Od poko‑iling sikandin to karnero nod poko‑usok woy'd pokoleggua amoy od nangkap to moppiyon sobsavan.

¹⁰Iddos tokawon, iyon dontulon din, idda ra en so kodponakow, kod‑imatoy woy koddora‑at. Piru siyak, mid undini a to ingod amoy od boggoy to umuu no lampas kos kopiyannoy.

¹¹“Siyak kos moppiyon tohodtamong to karnero. Dos moppiyon tohodtamong, nopanoy nod patoy atag da en to mgo karnero rin.

¹²Iddos minuvu nod boyaran da amoy'd tamong to mgo karnero, konna sikandin moppiyon tohodtamong woy konna mandad sikandin kos komunoy taddot mgo karnero. Purisu otid pokokita sikandin to movuut no tuyyang to movonnos nod inguma, od tonanan din da en baling iddos mgo karnero, su od paahuy sikandin. De‑en od pomuwoddon iddos mgo karnero woy'd pokodsuwoysuwoy ron.

¹³Od paahuy iddon minuvu, oyyos id boyaran da me‑en sikandin woy dii sikandin od kosowkuu taddot mgo karnero.

¹⁴“Siyak kos moppiyon tohodtamong. Su iling taddot Amoy ku woy siyak no nokodsorolloy ron oraroy, nosorollan ku iddos koddin mgo karnero woy nosorollan a mandad nikandan, woy nopanoy a nod patoy atag da en kandan.

¹⁶Na, duwon dumon mgo karnero ku no waa pa nosakup ka‑ay'n toril. Ko‑ilangan nod po‑usokkon ku mandad sikandan woy od pominoggon dan kos koddin bawos. De‑en od kosokkad don sikandan woy sokkad da kos tohodtamong dan.

¹⁷“Ini en kos unayan no id ginowannan a to Amoy ku, su nopanoy a nod boggoy to umuu ku woy kopongnga, od kovadnow a.

¹⁸Waa minuvu nod poko‑imatoy koddi otik dii ku id boggoy kos umuu ku. Su duwon kotungud ku no id boggoy ini woy duwon mandad kotungud ku to kodbadnow ka‑ay, oyyos ini en kos id suhu koddi to Amoy ku.”

¹⁹Na pomon taddot id oseng ni Disas, nokodba‑ad mandon iddos mgo Judio.

²⁰Mo‑uraa kandan kos mid ikahi to, “Eh, inin minuvu, od busawon don su id losuran to busow! De‑en mambo man tod pominoggon dow pa sikandin?”

²¹Piru iddos duma, mid ikahi to, “Konna ini osengan to minuvu no id losuran to busow. Duwon bo busow nod pokovawi to minuvun butud amoy'd pokokita?”

²²Na, duwon pista riyot Jerusalem nod ngoranan no pista to Kod‑upiya to templo, woy iddon timpu, timmohonnow.

²³Diyon mandad si Disas to templo woy id oipanow sikandin diyot Balkon ni Solomon.

²⁴Id livuungan sikandin to mgo ponguu to Judio, woy kahi ran to, “Kannu ru taman id ollos konami ko ondoy ka? Ponudtuli koy to mooggot, sikkow ve‑en kos Mesiyas?”

²⁵Mid tavak si Disas to, “Id ponudtulan kud sikiyu, piru dii kow me‑en od pomakoy. Iddos mgo mokososoobbu nid puungan ku ukit to kotungud to Amoy ku, idda en kos od posivonnaa ko ondoy a.

²⁶Piru dii kow en od pomakoy, oyyos konna ku sikiyu mgo karnero.

²⁷Dos mgo karnero ku, od pominog en to koddin bawos. Nokilaa ku sikandan woy od ikuu ran koddi.

²⁸Id boggayan ku sikandan to umuun waad tomanon woy dii en sikandan od silutan to kopotayan. Waa ahad ondoy nod poko‑ahaw kandan pomon dinit bollad ku.

²⁹Iddos Amoy ku no id boggoy kandan dinit koddi, motuus sikandin to langun, woy waa ahad ondoy nod poko‑ahaw kandan pomon diyot bollad to Amoy ku.

³⁰Oyya su iddos Amoy ku woy siyak, sokkad da.”

³¹To norinog idda taddot mgo Judio, id pomurut mandon sikandan to mgo batu amoy'd lumbahon sikandin.