Yohane 10:3-31

³Mbetetsi kompfughulila libani, na wang'olo wohulikitsa litsi lya mdimi. Kowakema wang'olo wake kwa mataghwa, kowalongotsa kunze.

⁴Hayowalapfa kunze wang'olo wake kowalongola, na wang'olo wake womuwinza kwaapfila womanya litsi lyake.

⁵Lekeni ng'awomuwinza bae imunu yungi, watsomlema kwaapfila ng'awomanya bae litsi lye imunu yungi.”

⁶Yesu kawalongela imbuli ino, lekeni ng'awamanyile bae chayawalongele.

⁷Kuya Yesu kalonga keli, “Nowalongela ghendo, nene nalibani lya wang'olo.

⁸Iwanu wose iwanongole tsawabapfi na wabokaji, lekeni wang'olo ng'awawahulikitse bae.

⁹Nene nalibani. Imunu wowose iyakwingila kubitila nene katsokombolighwa. Katsakwingila na kulawa, naye katsopata ipfijo.

¹⁰Wabapfi wakutsa kwiba, kukoma na kuhinya, nene nitsa wawe ne ughima bwelele, na watsokala ghamatsuwa ghose.

¹¹“Nene namdimi yaninoghile. Mdimi yanoghile kolapfa ughima wake kwa wang'olo.

¹²Imunu yodima kwa kulihighwa na si mdimi yane iwang'olo bae. Hayomwona yumbwa wa kumuhulo kakutsa, kowaleka iwang'olo kotsuma. Apfo yumbwa wa kumuhulo kowaghogha iwang'olo na kowapwililisa.

¹³Imunu ayo kotsuma kwaapfila yeye ka imunu wa kulihighwa na ng'owalolesa bae wang'olo.

¹⁴“Nene namdimi yaninoghile, nowamanya wang'olo wangu na wang'olo wangu wonimanya,

¹⁵ka Aba pfayonimanya na nene nommanya Aba, na nowalapfila wang'olo ughima wangu.

¹⁶Nina wang'olo wangi, awo si wa banda lino. Pfipfila nobamighwa niwaghale. Pfipfila nawo watsohulika litsi lyangu, na kutsakuwa na kingili limwe na mdimi yumwe.

¹⁷“Nomnoghela Aba wangu kwaapfila nolapfa ughima wangu ili niubokele keli.

¹⁸Kuduhu imunu iyoniboka ughima wangu. Noulapfa imwenyegho ughima wangu kwaapfila nodaha kughulapfa na kughusola keli. Nibokela laghitso lino kulawa kwa Aba wangu.”

¹⁹Mbuli tsino tsa Yesu tsiwatenda Wayahudi weghole keli.

²⁰Iwanu wemwenga walonga, “Kana chinyamkela na kamkwalukwale. Ule mwomtegheletsa?”

²¹Lekeni wangi walonga, “Imunu yane chinyamkela ng'odaha bae kulonga pfino. Apfi chinyamkela kodaha kumhonetsa imunu chifita?”

²²Hako Yerusalemu tsakukala na Chihungo cha Kuika wakifu Ing'anda ye Imulungu, tsaghukala msimu ghwa chipfeghetsi.

²³Yesu yang'ali yakwanga mne Ing'anda ye Imulungu hane chitala cha Selemani.

²⁴Wayahudi wamtsunguluka wamghutsa, “Kutsotuleka tuleke kumanya mbaka tsuwachi? Tulongele mwatsimwatsi ka ghweghwe kwa Kiristu Mkombotsi.”

²⁵Yesu kawedika, “Tsaniwalongela, lekeni ng'amnitoghole bae. Pfihulo ipfanitenda kwa taghwa lya Aba wangu pfonilangusa,

²⁶lekeni mwemwe ng'amtoghola kwaapfila mwemwe si wang'olo wangu.

²⁷Wang'olo wangu wohulika litsi lyangu, nowamanya, nawo woniwinza.

²⁸Noweng'a ughima wa ghamatsuwa ghose, nawo ng'awatsakufa bae. Kuduhu imunu iyodaha kuwaboka mna ghamoko ghangu.

²⁹Aba wangu, iyangaile, ka mkulu kubita wose, kuduhu imunu iyodaha kuwaboka kulawa mna ghamoko gha Aba wangu.

³⁰Nene na Aba twa chinu chimwe.”

³¹Wayahudi wadondola keli ghamabwe wamtowe Yesu,