Yuhaana 10:3-31

³Cakkiiɗo dammugal maɓɓitanan mo, baali ɗin bo nanan daane makko. O noddiran ɗi, ŋaye fu e inne mum, o yaara ɗi yaasi.

⁴To o wurtinii ɗi ɗi fu, o ardoo ɗi, ɗi tokka mo gam ɗii anni daane makko.

⁵Abada ɗi tokkataa koɗo, amma ɗi doggan mo nun faa woɗɗi gam ɗi annaa daane hoɓɓe.»

⁶Yeesu waɗani ɓe ballool ŋol, amma ɓe paamay ko ŋol fillitii.

⁷Yeesu wi'i ɓe kade: «Mii bata on e gooŋa, min woni dammugal baali.

⁸Artuɓe am warugo fu, laati nun wuyɓe e pasotooɓe, amma baali ɗii nananay ɓe.

⁹Min woni dammugal. Neɗɗo fu naatirɗo e am, hisan, heɓan durdugol, ooran, jaannyan.

¹⁰Gujjo warataa maa gam wujja, o wara, o biisa, amma min, mi waru nun gam himɓe heɓa yonki, heɓa ki kii heewi.

¹¹Min woni duroowo geeto. Duroowo geeto woni kokkitiroowo yonki mum gam baali mum.

¹²Amma biiro, mo laataaki duroowo geeto, mo jeyaa baali, to yi'ii buuru, sey dogga, acca baali. Buuru nanŋa baali ɗin, sankita koriiɗi.

¹³Biiro on doggan gam faalaaka e majji.

¹⁴Min woni duroowo geeto. Mii anni baali am, baali am bo e annimmi.

¹⁵Hande no Baaba annirimmi, non annirmi Baaba. Mii hokka yonki am gam baali am.

¹⁶Mii woodi kade baali goɗɗi ɗi galaa der hoggo ŋo. Ɗii ɗon bo haani mi dura ɗum. Ɗi nanan daane am, ɗi laatoo darne woore, ɗi gooda duroowo gooto.

¹⁷Baaba e yiɗimmi gam mii hokkitira yonki am gam mi heɓitoo ki kade.

¹⁸Goɗɗo ittantaa am ki, min hokkata ki e hoore am. Mii woodi baawɗe hokkitirgo ki, mii woodi bo baawɗe heɓitaago ki. Ooda kaa ɗon keɓumi e Baaba am.»

¹⁹Batuuji ɗii seenni kade Yahuduuɓe.

²⁰Ɗuuɓɓe maɓɓe e wi'a: «Oo ginnaajiijo nun, o haaŋa nun. Gam ume go oon kettinanoo mo?»

²¹Amma woɓɓe wi'i: «Batu kaa, haala ginnaajiijo bane. Ginnool waawan ko wuntini bunɗo na?»

²²Juulɗe senuki suudu Alla e waɗenoo Urusaliima. Ɗum fottii e dabbune.

²³Ley suudu Alla ɗon, Yeesu e yaha e warta ley danki Suleymaanu.

²⁴Yahuduuɓe fiiltitii mo, wi'i mo: «Faa dey accataa men der seko? To an woni Cuɓaaɗo laaɓinan men.»

²⁵Yeesu toontii ɓe: «Mi batii on, on goonɗinay. Golleeji ɗi gaɗirmi inne Baaba am, e seedanoo am.

²⁶Amma on goonɗinay gam on laataaki baali am.

²⁷Baali am e nana daane am. Mii anni ɗi, ɗii tokkimmi.

²⁸Mii hokka ɗi yonki tabitiiki, ɗi baatataa abada. Goɗɗo teetataa ɗi e junŋo am.

²⁹Baaba am kokkuɗo am ɗi, ɓuri huune fu. Goɗɗo waawataa ko teeti ɗi e junŋo Baaba.

³⁰Min e Baaba fu, men gooto.»

³¹Den Yahuduuɓe etti kade kaaƴe gam ɓe paɗɗa mo.