Jon 10:3-31

³Ndramak ta atondrok madasan kameh eme sihi kou, ma iri sipsip ale anuhun bohon amwenen. Iy eme aloh nyara iri, ma iy sirini iri ado bolo kowah ame manan.

⁴Iy eme sirini iri sipsip tan marakon ado bolo kowah ame manan, ano iy edek in bwena, ma iri sipsip tan adek a-en hamon tan, tasah iri tana iri iy ma iri anuhun bohon amwenen.

⁵Iri winiyan ba-en hamon ta ari ndramak badu kon leheleh bwe, ma idah kameh iri atobwak tan ale, tasah iri anuhun boho ndramak ari ja.”

⁶Jises amekes sahou sokek, arile iri bandrei se bolo sahou tan iy asehek ili tiri se bwai.

⁷Jises eme asehek sahou san rasan ja, “Jo tiye taha handru, jo madasan handru tiri sipsip.

⁸Iri lau rayah ndrame bwena badeh, iri lau ta bahana ma iri ta akohok lakou laleyah, eme ma bwidi iri sipsip banuhun boho iri bwe.

⁹Jo le, jo madasan handru, are lau iy anya keme bolon loboho madasan jo udu aliy, iy kameh winiyan bamak bwe. Iy kameh winiyan edek ili bolon, ano iy eme manan ja, ta asilah nan bwidiu nyorowan badu kapa gwa.

¹⁰Iy ndramak ta bahana, iy winiyan bame laleyah bwe, iy eme badeh, ta bahana iri sipsip ma ta adai iri marakon amak au. Jo eme dah badeh, ta edeu koha iri udu luluwen. Ma koha iri winiyan bapwe bwe, idah kameh udu luluwen labai.

¹¹“Jo le badeh, jo ndramak mwasin handru ta atondrok iri sipsip. Iy ndramak mwasin ta atondrok sipsip badeh, iy winiyan banoh ta imek ta iri sipsip tan bwe.

¹²Iy ndramak ibo gok ta akohok ndramas le, iy ndramak doh iy ta atondrok iri sipsip bwe, ma iri sipsip doh, tan bwe. Buku iy anyolom mwi badu lokei sakaliye eme ta aimon iri sipsip, iy kameh inoh, ma iy ruwani iri sipsip areu, iy kameh atobwak iu. Mwi eme ini iri, ma iri kameh atalan laleyah.

¹³Iy ndramak nane atobwak iu, tasah iy ta akohok le ndramas ta gok, iy ari ndramak handru ta tanan ta atondrok iri sipsip bwe.

¹⁴“Jo ndramak ari mwasin labai ta atondrok iri sipsip, jo tanan iri sipsip tek amwenen, ma iri sipsip tek amwenen tanan jo.

¹⁵I buku tama, iy tanan jo ma jo ale tanan iy, ma jo winiyan banoh ta imek ta iri sipsip tek bwe.

¹⁶Iri sipsip tek rayah badeh, bado bolo kowah bwe. Gok tek ta akohok iri kame hamon bolo kowah ale. Iri ale katana iri bohok, ma iri kameh ala le rakou, ma ndramak ari le atondrok iri mara-ei.

¹⁷“Katin ta tama aso-ok jo badeh, ta jo atehei ndrinek labai, ma jo banoh ta imek tiri sipsip tek bwe. Ano kameh jo andrei kohak eme hamon ja.

¹⁸Ari ndramak winiyan bandrei kohak ba-au bwe. Na tanan ma budon tek le amwenen jo edeu kohak iu. Boto-on ta adeu ma boto-on ta akohok eme hamon badeh, tek amwenen. Sahou batanau dah jo akohok badu mine tama amwenen.”

¹⁹Sahou nane doh eme ma bwidi ndrokowa iri Juwis udu aliy, ma apwai iri a la-uh.

²⁰Iri solo-an asehek anya, “Iy badeh, malawin ndra-in udu bwele-en ma iy lolo-ou. Buku sah? Taha sanuhun iy!”

²¹Iri lau rayah anya, “Sahou doh bala buku iy ndramak, balik bado bwele-en bo-oh! I buku balik udu bwele-en, iy winiyan babwidi mada ndramak kaseu, basak bwe.”

²²Len ta nyamon tinan anya kasahan Jerusalem ta abudon len nane iri atah asiu tinan ta Kindrei. Idoh udu bolo len ta kon nyala-an asahan ale.

²³Na len doh badeh, Jises edek in bolo asiu tinan ta Kindrei bahandra beleheleh ta Solomon, iri amekes na bek.

²⁴Iri Juwis ame turuki iy ales udu le alih tiri marakon, eme ma iri ndremenya iy, “Len sabe handru kameh ahi kabe-en ou? Buku ou Mesaya handru, ahi aso-ok ou asehek amwenen keme tahi na le dan!”

²⁵Jises eme asehek i tiri, “Jo ndrasehek ndrawek taha, arile aha batehei budon taha bala ta sahou tek bwe. Iri lahou tinan jo amekes na boto-on ta nyara tama badeh, ta aha katanan jo,

²⁶arile aha batehei budon taha bala ta aliy bwe, tasah aha sipsip tek handru bwe.

²⁷Iri sipsip tek anuhun ma iri tanan bohok. Jo tanan iri, ma iri adek an hamon tek.

²⁸Jo atehei kohak handru ili tiri, ma iri kameh winiyan bamak bwe, ma ari ndramak winiyan baruwi iri ado minek bala len bwe.

²⁹Tama amwenen, iy ndratehei iri ndrame tek, iy udu bwele-en labai tiri lakou marakon, ma ari ndramak winiyan baruwi iri ado mine tama ame len bwe.

³⁰Jo hawe tama, aru ari le.”

³¹Sahou tan eme ma bwidi iri Juwis akohok bek anya korou iy ja.