Samu 85:3-12

³Hogoteka kaipamo leka apateꞌnanaꞌmonanafa henagaꞌamo kaipamo falu huka apateꞌnane. Lusi kava huno kaipamo leꞌniyana afaꞌa ataleꞌnane.

⁴O, Gotiyo, huꞌna, lagufamo alika katika nelatana vekamae. Halate alika alagepa huka lateteka alika aika atagi neka lavalelika eno. Kaipamo falu huka lato.

⁵Muki afinaꞌmo kaipamo leka latesapiye. Hemenimo maiꞌnaya vayaꞌaifenagi henagaꞌamo afole aiꞌa maisaya vayaꞌaifenagi huka kaipamo leka apateka hano osuka leka apateme apateme ugapiye.

⁶Faligekana huta maiꞌnonagi halate alika he tika olategapiye. Vayakamogimo kagaefekeꞌmo apamogaga aisayafeꞌmae.

⁷O Ala kava nene, huꞌna, kahau huka lato. Lagufamo alika katika lato.

⁸Nagaemo Ala kava neꞌmo Gotiꞌa hisiya gemo afiguve. Agaemo agaiꞌa vayaꞌmo apaote vayaꞌaifeꞌmo alino nanu aeno apatesiya geeꞌmo hunoꞌaeꞌmo, lapaipamoꞌmo falu hino, huno hapa paigiye. Hapa paigiyaꞌmonanafa fiku kavanageꞌa aiꞌa atagineꞌa eꞌa halate negi kavaꞌmo hugae.

⁹Ha le konali yaꞌamoꞌmo lagae mopaleꞌmo hanege hanege huno hanesiyafeꞌmo agaefeꞌmo koli nehaya vayaꞌmo hapaopaleꞌmo eno apakufamo alino katino apategaiye.

¹⁰Hau huno apatesiya kavaꞌaꞌe lama geꞌaꞌeꞌmo eꞌana fotu huꞌnaꞌae. Fatago kavaꞌaꞌe alino nanu aeno apatesiya kavaꞌaꞌeꞌmo eꞌana hanaeꞌana neꞌnaꞌae.

¹¹Lama ge kavaꞌmoꞌa ma mopafatiꞌmo hagegekana huno afole aisigeno fatago kavaꞌmoꞌa kokuꞌnapatiꞌmo he tino aeno kamafaino apakegaiye.

¹²He, Ala kava neꞌmoꞌa alagepa yaꞌmo alino lamisigeno lagae mopafatiꞌmo neꞌyaꞌmo hagegaiye.