SAM 147:1-9

¹Buyambam tapatane umana yatangenatnong. Ninda kap taike Anututane umana yatangenake apbakngakamang. Ninda itane umana kopsa akngae yatangenatnimu take siwan noman gan siwik.

²Sike Buyambam tapata Jerusalemu gatu mitake inane aminabamu iwanata kaipake keu maa siknga yuak komune kuke pekingu gatu pakapunggak.

³Ita aminbamu apasiwan nomatakaing. Unzing meyata natdetdetna pasiwan maikaingun. Gatu watana kuut wamayamunggak.

⁴Sike ita yekap daau datdasingga ngangu gwa yawan yukut. Siwan ita yekap daau umana gwendu gwendu ayaninggak.

⁵Buyambam tapaninu umana kopsa siwan kekeknga kuupbam kayakan. Ninda itane natdetdetna tuwangutnanga dua.

⁶Sike ita aminu inane umana dua yapangenakaingu ita wa amindane umana ayapangenakgak. Siwan ngana wai aminu ita kapzang siknga yaipakepu peak.

⁷Buyambam tapae kap taike umana yatangenatnong. Gita dakandaka zipna gakngae noman ayawan Anutuninde ininim.

⁸Sike ita tasiwan minga aknga ena kakaa komune yuak. Yuwana sopa tewan epu zongazonga pasiwan tawan dakandakane akokaing.

⁹Ita nanamu ikwawa gaman gwegwende kuut yamunggak. Sike gatu kombunananggane matekngata ba yawan kaya ie nanamu ayamunggak.