SALMOS 91:6-11

⁶Amo xiquimacasi nopa taijyohuilisti cati huala ipan tzintayohuilot, yon nopa miquilisti cati ajsi ica tajcotona.

⁷Masque monechca miquise mil o majtacti mil masehualme, ta amo mitzajsis.

⁸Ica moixteyol tiquitas quenicatza quiselise tatzacuiltili nopa taixpanoca tacame.

⁹Sinta timotemachijtoc ipan TOTECO para mitzmocuitahuis, huan timochiya ipan Toteco Cati Más Hueyi para mitzpalehuis,

¹⁰huajca amo mitzajsis yon se tamanti cati amo cuali, yon amo quiajsis mochaj.

¹¹Pampa Toteco quintitanis ilhuicac ehuani para ma mitzmocuitahuica, huan mitzmocuitahuijtinemise campa hueli campa tiyas.