SALMOS 90:7-17

⁷Ẕbia yi'to' dan' ẕžo'o neto'. Že' zedlto' dan' ẕžá'ḻi'o neto'.

⁸Ẕḻe'elo' yógo'te da' bi nak chawe' da' žonto'. Ẕḻoe'elo' ḻaw ẕia da' nbága'to'.

⁹Ẕzacho'o yiz cheto' dan' ẕžo'o neto'. Žeyožgak yiz cheto' ka to be' da' ẕka'to'.

¹⁰Ka zej nak ža zoato' nbanto', zej nakzen chonnlalj chi yiz, na' cha' nakto' benne' waḻe, wak soato' nbanto' taplalj yiz, san ka zej nak yiz ka', ẕzáka'to', na' že' zedlto'. Ka' gaze ẕdegak yiz ka', na' ẕnitlto'.

¹¹¿Noẕ benne' nnezle' binlo ka nak yeḻa' ẕža'a chio'? ¿Noẕ benne' nnezle' ka nak yeḻa' yichj ža'a chio'?

¹²Bsedle neto' wkonlto' binlo žin ža cheto' ka', nich gak chejni'ilto' cháwe'do'.

¹³X̱anto' Dios, beyón neto' toze ḻen Le'. ¿To chi'ize želo'? Beyache' ḻaže'l neto', benne' wen žin chio' ka'.

¹⁴To to zil bzoa yichj ḻáẕdo'to' yeḻa' ži'i ḻaže' chio', na' ḻo yeḻa' žebele góḻtezto' chio' yógo'te ža soato' nbanto'.

¹⁵Benn cheto' yiz zan nich yebelto' ka zej nak yiz bsáka'ḻi'o neto', na' ka zej nak yiz wžé' zedlto'.

¹⁶Be' neto', benne' wen žin chio' ka', latje ḻe'elto' da' ẕen da' žono', na' ḻé'egekle ẕa'sóto' ka' yeḻa' ẕen chio'.

¹⁷X̱anto' Dios, ben chawe' neto'. Ben chawe' žin da' žonto'. ¡O', X̱anto' Dios, ben chawe' žin da' žonto'!