A Umana Kakailai 90:7-17

⁷Tago kaum kankan i vaimur avet, Ma ave purpuruan tuna ta ra karangap i kaum kankan.

⁸U tar vung vaarike kaveve lavur varpiam ta ra luaina matam, Ma kaveve lavur varpiam ba i tur ivai, u tar vung diat ta ra talapar i ra matam.

⁹Tago kaveve nilaun i panie ke ta kaum kulot, Ma ave vapar vue kaveve kilakilala da ra oir.

¹⁰Kaveve kini ati ra pia i varogop ma lavurua na vinun na kilakilala, Ma ba i ongor ra paka i vevet, kan na varogop ma lavutul na vinun na kilakilala; Ma ra dekdek na papalum ma ra niligur i vana rikai ta kadia minamar, Tago i par lulut, ma ave vilau ka.

¹¹To ia i nunure ra dekdek i kaum kankan, Ma ia i nunure kaum kulot upi na tul tar ra variru tam ba na topa u?

¹²Una tovo mal avet, upi avet a nuk pa ra mutuai kaveve nilaun, Ma avet a ongor upi na kapa ra bala i vevet.

¹³Aivia boko ra bung dari? Una lilikun, Luluai, Ma una mari mule kaum umana tultul.

¹⁴Una vamaur lulut avet ma kaum varmari, Upi avet a kukula na gugu, ma avet a ga ta kaveve nilaun par.

¹⁵Una vagagane avet, upi kaveve umana bung na gugu diat a varogop ma ra lavur bungbung u ga valigur avet i tana, Ma ra lavur kilala ave ga malari tana.

¹⁶Una vaarike kaum papalum pire kaum umana tultul, Ma kaum minamar tadav ra umana natu i diat;

¹⁷Ma boina ba ra minamar kai ra Luluai kaveve God na ki ta vevet; Ma una vatavua ra papalum na lima i vevet, Maia, una vatavua ra papalum na lima i vevet.