Mbouŋ to Yes Israela 90:7-17

⁷Mbalmbali tiom ipapasob ghei. Tiom imozmoz ghom pa sosor tiei, ve ughurghur atia payei. Tauto matughezaaŋ tiina igham ghei.

⁸Pasa, ŋgar tiei tisob to tiyel pa ŋgar tiom, yom matam kisin di. Sosor tiei to ŋgozaaŋ, tisob tineep ghazooŋa ila matam. Eta iyooŋ maau.

⁹Tovenen sawa isob to nineep izi taan, mbalmbali tiom izaza tiei. Tauto nineep sawa tuku moghon, ghoro yaghuramai isob, ve nimaat.

¹⁰Nineep irau ndaman tamoot tol saaŋgul (70) moghon, ve nimaat. Ve ighaze tapirimai iraua, ghoro nineep irau ndaman tamoot paaŋ (80) ma venen. Ve ndaman tiei to naol ne, nirabrab taumai pa uraat, ve nimbadbaad pataŋani. Sawa samia, ve sawa poia paam. Nighamgham tovene ila le rikia moghon nivot pa sawa tiei, ghoro nisob.

¹¹Maaron, sei ighilaal katin mbalmbali tiom tapiri? Mbalmbali tiom to iŋaŋarua ghei ne, sei ighazooŋ pani, leso imatughez payom, ve itaghon aliŋam? Eta maau.

¹²Tovenen ugham ghei nighilaal nighaze nepooŋ tiei to taan, nene tuku kat. Leso ŋgar tiei ivot, ve nighilaal ataam to nineep pooi.

¹³O Yoova, ŋeez o utoor ŋgar tiom, ve matam inim payei muul? Lolom isamin ghei ve uul ghei. Pasa, yei mbesooŋa tiom.

¹⁴Mboŋmaagh to naol ne, nighaze upavonin ghei pa poia tiom, ve upatooŋ ŋgar tiom to lolom ineep tuŋia ila to tamtoghon tiom ve uluul di. Leso lolomai poia ve tinimai iza, ve nimboumbou ila le sawa tiei isob.

¹⁵Ugham sawa poia ivot. Leso lolomai poia, ve iyat ndaman katindi to ughur pataŋani payei ve nineep sami.

¹⁶Yei mbesooŋa tiom nighaze nighita ghom ugham uraat tintina tivot muul. Ve papaghu tiei to muri pale tivot ne paam, nighaze upatooŋ tapirim padi toman poia tiom to izam tiina pani, ve tighita.

¹⁷Yoova, yom Maaron tiei. Lolom poia payei, ve ughur poia tiom iza tiei. Leso uraat to nighamghami pa nimamai ilaan poia. Upalot uraat tiei. Leso anoŋa ivot.