Salmos 86:5-17

⁵na' Lue', Xran, nacu' xrlátaje, ne dxunite lau' chee̱ntu'. Zúate̱quezu' xexache lazru' benne' ca' dxululáwizre̱' Lue'.

⁶Xrana' Dios, bene da dxuchálajle̱na' Lue', ne bze̱ naga ca da dxenaba' lau'.

⁷Lu zra sua' lu da sté̱bele̱'e̱ wanné̱queza' Lue', lawe' da dxexeché̱bequezu' Lue' chia'.

⁸Xran, quebe nu chilá' Dios ca Lue', ne quebe nu dxun ca da dxunu' Lue'.

⁹Xelelá' bénneache dute̱ xe̱zr la xu da be̱nu' Lue', na' xelúe lá'anaqueze̱' Lue', Xran, ne xulucá'ana szrene̱' Lau' Lue',

¹⁰lawe' da nacu' Lue' szren, ne dxunu' da dxexebánentu'. Tuzu' Lue' nacu' Dios.

¹¹Bse̱de neda' da dxaca lazru' guna', Xrana' Dios, na' guna' ca naca da li chiu'. Gunná be'e lázrdawa' chee̱ zreba' La cuinu'.

¹²Dute̱ lázrdawa' güe lá'anaqueza' Lue', Xrana' Dios, ne gucá'ana szrénqueza' Lau' chadía chacanna,

¹³lawe' da zúate̱quezu' xexache lazru' neda', ne bseláu' bénne'du xu'a lu lataj ba xa'.

¹⁴Dios, belasa benne' dxulucá'ana szren cuine̱', ne dxeledábague̱' neda', na' benne' xichaj zra'a ca' belune̱' tuze dizra' xelútie̱' neda', ne quebe dxelezrebe benne' ca' Lue'.

¹⁵Lue', Xrana', nacu' Dios dxexache lazru' netu', ne nacu' zren lazre', ne quebe dxezrá'azeu', san zúate̱quezu' xexache lazru' netu', ne nacu' li lazre'.

¹⁶Gunná' ca naca chia', ne bexache lazre' neda'. Be̱nna chia' neda', we̱n zrin chiu', xel-la' waca chiu', na' bxue neda', zri'ine nu'ula we̱n zrin chiu'.

¹⁷Ble'e neda' tu da gaca bea na gaca chawe' chia', ne be̱n xelelé'e benne' ca' dxelecuídene̱' neda' da na', ne be̱n xelexedué'ene̱', lawe' da nacu' Lue', Xrana' Dios, Bénnea' gúcale̱ne̱' neda', ne bexúe zrene̱' neda'.