Ola Saam 86:5-17

⁵Bos, yu oldei gud langa melabat en oldei larramgo melabat fri. En langa ol detlot hu oldei jingat langa yu, yu laigim olabat olagijawan.

⁶YAWEI, yu lisin langa main preya. Yu lisin langa mi wen mi jingat langa yu blanga album mi.

⁷Wen trabul kaman ai jingat langa yu, dumaji yu oldei ensim mi.

⁸Main Bos, det najalot drimin nomo jidan wulijim yu. Detlot drimin kaan dum wanim yu gin dum.

⁹Ola pipul langa ebri kantri weya yubin meigim garra kaman en nildan langa yu, en olabat garra preisim yu dumaji yu brabli haibalawan.

¹⁰Yu na brabli strongbalawan en haibalawan, en yu dum ola brabli gudwan ting. Yu na wanbala, yu jidan God.

¹¹YAWEI, yu meigim mi sabi wanim yu wandim mi blanga dum, en ai gin wok langa det trubalawei. Album mi blanga wek blanga yu garram brabli trubalawan hat.

¹²God, main bos, ai garra preisim yu brabliwei garram ebrijing insaid langa mi, en ai garra kipgon dalimbat ebribodi blanga yu haibala pawa.

¹³Blanga yu filing blanga laigimbat mi im detmatj, im kipgon olagijawan. Aibin gulijap binij bat yubin seibum mi.

¹⁴Main God, detlot praudbala pipul geingap langa mi blanga trai kilim mi ded, detlot pipul na weya dei nomo oldei jinggabat langa yu.

¹⁵Bat yu na main God. Yu jidan garram kainbalawan en soriwan filing, en yu laigimbat pipul olataim. Yu nomo gitwail kwikbalawei, najing. Yu oldei jidan kainbala en yu truwan.

¹⁶Luk langa mi en sori langa mi. Meigim mi strongbala en seibum mi dumaji mi wek blanga yu laik main mami bin wekwekbat blanga yu.

¹⁷YAWEI, shoum mi yu gudbalawan langa mi, en detlot hu nomo laigim mi garra jidan sheimwei na, wen dei garra luk yubin album mi en meigim mi gudbinji.