Psalms 86:5-17

⁵Gur e gab gol ngomad ma ga ma n’agfan u wun’um e kireb romad, ma gubin e pi’in yad ma meybil ngom e yad ba sug ko fare t’ufeg rom ni dabimus.

⁶SOMOL, mu telim ko meybil rog; mu rung’ag e meyor rog ni gu be man ayuw.

⁷Gu be piningem ko yu ngiyal’ ni ku gu aw nga fithik’ e oloboch, ni bochan e ga ma fulweg taban e meybil rog.

⁸A Somol, dariy reb e got ni bod gur, ma dariy reb nike rin’ e n’en ni kam rin’.

⁹Gubin e nam ni kam sunmeg e bay rabad ngar siro’gad ngom, miyad pining e sorok nga fanam gil.

¹⁰Ya gur e rib gel gelngim ma ga ma ngongliy e maang’ang; kemus ni go’ gur e Got.

¹¹SOMOL, mu fil ngog ko mang e ga ba’adag ni nggu rin’, ma bay ug fol rom u fithik’ e yul’yul’; mu fil ngog rogon ni nggu pigpig ngom u polo’ i lanin’ug.

¹²A Somol ni Got rog, bay gu pining e sorok ngom u polo’ i gumircha’eg; bay ggilnag fithingam ni dariy n’umning nap’an.

¹³Rib ga’ e t’ufeg rom ngog ni fare t’ufeg ni dabimus! Kam ayuwegneg u pa’ e yam’.

¹⁴A Got, girdi’ ni tolngan’ e karbad ni togopluw ngog; ma barba’ i girdi’ ni kireb e yad be guy rogon ni ngar thanged e pogofan rog, ni girdi’ ni dariyfam u wan’rad.

¹⁵Machane gur Somol e ga ba Got nri gama runguy ma bt’uf e girdi’ rom, gubin ngiyal’ ni ga ba gumaen’, gubin ngiyal’ ni ga ba gol ma ga ba yul’yul’.

¹⁶Mu cheal ngam sap ngog ngam runguyeg; mu pi’ gelngig ma ga ayuwegneg, ya gu be pigpig ngom nri bod ni i rin’ e chitinag.

¹⁷SOMOL, mu dag ngog e pow u fanam manigil; ma pi’in yad be fanenikayeg e bay ra tamra’gad nap’an ni yad ra guy ni ka mu ayuwegneg ka mu fal’eg lanin’ug.