SALMOS 86:5-16

⁵Toteco, ta nelía ticuali huan timoquetztoc timocualtalijtoc para titetapojpolhuis. Tiquinicnelía huan nimantzi tiquintasojta nochi cati mitztajtaníaj motapalehuil.

⁶TOTECO, techtacaquili quema nimotatajtía. Quena, techtacaquili quema nimitztzajtzilía.

⁷Nimitztzajtzilis ipan nopa tonali quema nechajsis taohuijcayot, pampa san ta technanquilía huan techpalehuía.

⁸Ipan nochi sequinoc cati quintocaxtíaj “dioses”, amo onca seyoc quej ta, Toteco. Huan amo aqui hueli quichihua huejhueyi tamanti quej ta tijchihua.

⁹Elqui ta cati tiquinchijchijqui nochi talme ica inimasehualhua. Yeca hualase huan mitzhueyichihuase, Toteco. Huan mitzhueyitalise ta cati titatzejtzeloltic,

¹⁰pampa ta tahuel tihueyi huan tijchihua huejhueyi tamanti. ¡San ta nelía tiDios!

¹¹TOTECO, technextili moojhui huan nijtoquilis pampa san ya nopa temachti. Xijchihua para noyolo ma mitzhueyitepanita, huan ma quiimacasi mitzixpanos nochi nonemilis.

¹²TOTECO Dios, nimitzpaquilismacas ica nochi noyolo huan nimitzhueyitalis para nochipa,

¹³pampa tahuel hueyi motaicnelilis ica na, huan amo quema tami. Ta techmanahuijtoc para amo niyas micta campa tanahuatía miquilisti.

¹⁴Toteco Dios, miyac masehualme cati mohueyimatij huan cati mosisiníaj motanantoque para nechtehuise. Huan miyac tatehuijca masehualme huan taixpanoni quinequij nechmictise, huan amo moyolilhuíaj ten ta.

¹⁵Pero ta Toteco nelía titetasojta huan hueyi moyolo. Amo nimantzi ticualani. San ta titeicnelía huan san ta timelahuac.

¹⁶Techtachili ica miyac taicnelijcayot huan techmaca chicahualisti na nimotequipanojca. Huan xijmanahui icone mosihua tequipanojca.