Salmos 84:4-12

⁴Tputs shiyash pangish taaksin, mang' kis taakanaya. Shiyaa uru yasiyastar ashkusin, ungirtakanaya.

⁵Tputsirish shiyamun mang' kis taakanaya. Ashiri shiysha tuwizpurtangcha. Uru mang' kis, Apanllip pang' naapani, atusin, shiyap pangish, machip Siyonap naakanaya.

⁶Naakchusin, tsap sur Tanushinung tushiykchusin, shiysha istakush, nda sambaytakanaya. Sin sinakchu, tsapoo kachachtakchu, kissha aranginasha naakanaya.

⁷Ashiri mang' ksaptari nda sambaytakusin, shiyap pangish machip kárkanaya. Siyonash kuseersin, shiyash pshtukanaya. Shiy kizpurtishcha Apaa.

⁸Apaa Taarashipani, shiyamari kasiru taaksha. Iy Israelchichini shiyaa Apanllirtanicha. Ashiriya, nuw shiyaa mashki anoo mazinangcha.

⁹Apaa, shiy iyaa kurakarini ipusarangush, wanasiri napangcha. Ksutangcha.

¹⁰Shiyash pangish pshtumaam kizpurcha wanasiri. Zapantaa zari arap taakuri nda mapiykina. Itaru, shiyash pangish minamaritaatiya zar taakuri, mapiyruri kis taakina. Mangi kis mapiyruri taachina. M'chachtaati, shiyash pangish tuchinamapan taakuri, kisshapari taachina. Itaru, tputs yutaritshishpanpa taakuri, ¿antaati ksaja taachi?

¹¹Shiy Apaa Taarashipani, zar tamapari ashiru iyaa tuwasineekush, iyaa ksutaksha. Yuw tputs itsinsaru taaku, anoo kapung chinakush, shaanshu pangish tapshtukush, Uru wanasiri ksutaksha.

¹²Apaa, shiyamari kasiksha. Tsapurunaseetstam, kanindaatstam ichinguru kasiru taaksha. Shiy tputsirish shiyamun mang' tatkusin, mang' kis taakanaya.