SALMOS 83:4-18

⁴Wnnágake': “Le cho'o, wžía yi'žo benne' ka' nich biž soa yež chégake', na' biž soa no benne' chejsá' ḻaže'e che yež Israel.”

⁵Ba béngake' toze diža' bi da' góngake' chio' Le'. Nákgake' toze ḻo da' žénegekle' góngake'.

⁶Ki žongak benne' Edom ka', na' benne' Ismael ka', na' benne' Moab ka', na' ẕa'só Agar ka',

⁷na' benne' Jebal ka', na' benne' Amón ka', na' benne' Amalek ka', na' benne' Filistea ka', na' benne' yež Tiro ka'.

⁸Ḻezka' benne' Asiria ka' zej nake' toze ḻen ḻégake'. Yógo'te benne' ki žónḻengake' tẕen ẕa'só Lot ka'.

⁹Ben chegak benne' ki kan beno' chegak benne' Madián, na' kan beno' che Sísara, na' kan beno' che Jabín žoa'a yegw Sisón,

¹⁰benne' ka' beto' Le' ḻo yežlyó Endor, na' beyákgake' ka x̱che'e beže dan' žonen beb ḻo yo.

¹¹Ben ga gak chegak benne' blo ka' chegak benne' ki kan gok che Oreb, na' che Seb, na' ben ga gak chegak benne' ka' ẕnna biá'gake' benne' ki kan gok che Seba, na' che Salmuna,

¹²dan' wnnagak benne' ki: “Gak chežo yežlyó gan zej nnita' benne' ka' che Dios.”

¹³Dios chia', ben ga gákgake' ka laga' biž da' ẕche' to be' da' žechjlen. Ben ga gákgake' ka beb da' ẕche' be' bdone'.

¹⁴Ka žon to yi' da' ẕzeyen to ya'a ẕen, na' ka žon yi' da' ẕzeyen to ḻo win biž,

¹⁵ka'kze wẕía ḻaže' benne' ki to ḻo be' bdone', na' bchebe ḻégake' ḻen to da' ẕen da' gono'.

¹⁶Ben ga yedoé'eḻe'egekle', nich gápegake' Le' ba la'ne, X̱anto' Dios.

¹⁷Ben ga chíx̱gekle', na' kwe' zédgekle' to chi'ize. Ben ga gá'ngake' ka'ze, na' gátgake'.

¹⁸Ben ga yeyónbia'gake' nako' Le' X̱anto' Dios. Tozo' Le' nako' Dios ẕente ḻawle dot yežlyó.