SAM 83:4-18

⁴Waaminda anzing yakaing, “Ayom! Ninda Isrel nana wena aknga pasinim. Siwan aminu kunduta waaminde umanae gatu dua natapning.”

⁵Sike waaknga tasinangge wamu takngatukan yakaing. Siwan waakwau notna notna dakngake ga ayaitakepnangge tasikaing.

⁶Aminu wamu waaknga yakaingu wa Idom kep komune nana gatu Ismael kem komune nana gatu Moap kep komune nana gatu Itakri kep komune nana gatu

⁷Gebal kep komune nana gatu Amon kep komune nana gatu Amelek kep komune nana gatu Filistia kep komune nana gatu you gapmandu Tair yot gapmane yuaingu ngangga notna notna dakngake gae masa gamunangge natake pasap taknga tasikaing.

⁸Sike dongu kekeknga Siria kep komune nana kuut unekan iat gatake yuke Lotdane bapuna waakwau gatayamukaing.

⁹Siwan gata tupa aminu keu Midian komune nana aminde tasikuyak takngakan waakwakgea tasiyo. Ngan, gata aminu Sisera gatu Jambin yangga buyambamu Kison tapane yukumayakge tasikuyak takngakan tasiyo.

¹⁰Tapduu waomune gata waaminu Endor yotbam gapmane pasiwi maiwan gupna kepdakane yumdekan yuke apbukataking.

¹¹Gata amak amindane tupan tapaapa meya tupa Orep nana gatu Sep nana ngangge yamukuyak binga yamuyo. Gata tupan gwapaknga amin pasiwi umana wena Sebaat gatu Salmunaat sikumaak binga sinong.

¹²Sike waakwakga anzing yaking, “Ninda Anututane kepna atana nisane dakngawik,” ngang yaking.

¹³Natane Anutuna, gata kupopongga enakaing binga yanikwasiwi unda unda kunong. Gata ooi akwau got takngata puyapamapan kukaing binga unzing yanikwasiyo.

¹⁴Sike katap gwenu sak kangaatang itzikgak. Siwan tawanu saknga kayaatangu katau buyambam isinggak.

¹⁵Ina unzakan, gata sopa buyambam tewi epu take waakwau yawamban atdatakuning. Siwan gata got taknga tasiwi kekeknga siknga puyake pasiwan akgwautnong.

¹⁶Buyambamtapa, gata aminu waakwau yaipakepi apmaakanong. Siwan ga gawananggengu atnatapning.

¹⁷Nata nataau gata ayapbimbi waakwakga gae asinggan gwautning. Gata pasiwi maakawana waakwau zipi kumnong.

¹⁸Nata nataau gata waaminde unzing tasiwina waaminda apme natdetning. Ga gika siknga, ga Buyambam tapa, siwan ga Anutu enane siknga yuak. Yuke kepna kepna kuupbam kakuya tasinggak ngangu natapning.