SALMOS 81:4-12

⁴pampa Toteco Dios cati eli iTeco tohuejcapan tata Israel techmacatoc nopa tonali para ma tipaquica miyac. Huan nojquiya eltoc ijcuilijtoc ipan itanahuatilhua para ma tijchihuaca.

⁵Huan techmacac para ma tiquelnamiquica cati quichijqui ica José, huan quenicatza motehui inihuaya nopa masehualme ten tali Egipto, campa titetequipanojque san tapic. Nijcajqui camanaltic se cati amo niquixmatqui huan quiijto:

⁶“Ama nimechquixtilis nopa tamamali cati anquihuicaj amoajcoltipa, huan ayecmo anquitananase ica amomax tamanti cati tahuel etic.”

⁷Nojquiya quiijto: “Amojuanti antechtzajtzilijque quema anitztoyaj ipan taohuijcayot huan na nimechmaquixti. Nimechnanquili hasta ten nepa tepet Sion campa motatía nopa tatomonilot. Nojquiya ipan tali Meriba nimechyejyecohuili amotaneltoquilis quema anmotequipachohuayayaj pampa amo oncayaya at.

⁸Yeca annoisraelita masehualhua, techtacaquilica quema chicahuac nimechtacahualtía.

⁹Amo quema xijhueyichihuaca seyoc cati quitocaxtíaj ‘dios’. Yon amo xiquinpiyaca taixcopincayome ipan amocalijtic.

¹⁰Pampa elqui na, niamoTECO huan niamoDios, cati nimechquixti ipan tali Egipto. Xijtapoca amocamac huan anquiitase sinta amo nimechixhuitis. Quena, anquiselise nochi tamanti tatiochihualisti cati amechpolohua.

¹¹¡Pero amo! Nomasehualhua amo quinejque nechtacaquilise. Israelitame amo quinejque ma niitzto tatajco inijuanti.

¹²Yeca niquintahuelcajqui para ma huihuitiyaca huan ma elica quej popoyotzitzi. Huan niquincahuili ma quichihuaca cati inijuanti quinequiyayaj.