SALMOS 78:12-71

¹²Bene' yeḻa' wak ẕen ka' ḻawgak x̱a x̱tó'gake' ka' ḻo yežlyó Egipto, na' ḻo yežlyó Soán.

¹³Bsaljwe' nez ḻo nisdo' gan wdegak benne' ka'. Bene' nisdon' ka ya'ado' ka' cheḻa'a weje.

¹⁴Te ža bḻoe'ele' benne' ka' nez ḻen to bejw gasj da' bnáwgake', na' žel ḻen to bejw da' bsa'nín'.

¹⁵Wḻé'e yej ka' gan nak yo biž, na' bye'je' benne' ka' nis da' bžojen ḻe'egak yej ka' ka to yegw nis.

¹⁶Bene' ga bžoj to yegw nis ḻe'e yej na', na' goken to yegw ẕen,

¹⁷san béngakže' doḻa' ḻaw Dios ḻo latje dach, na' bží'igake' che Dios, Bennen' nape' dot yeḻa' wak.

¹⁸Ni'a che da' wdán ḻáže'gake' béngake' ga bža'a Dios. Wnnábgekle' Ḻe' da' gáwgake' ka wdán ḻáže'zegake'.

¹⁹Wnnégake' che Dios, na' wnnágake': “¿Wak gonn Dios da' gawžo ladjw yix̱e' nga?

²⁰Da' likze wlé'e yej na', na' bžoj nisen', dan' goken ka to yegw ẕen, san, ¿wak gonne' chežo yet, na' gonne' beḻa' da' gawžo?”

²¹Che ḻen bža'a X̱anžon' kate' benle' da' ni, na' bseḻe'e to yi' da' bzeyen baḻ benne' chie' ka', na' bgole yeḻa' ẕža'a chie' ḻen benne' Israel ka',

²²dan' bi bejḻé'gake' che Dios, na' bi bx̱en ḻáže'gake' Ḻe' yeslé' ḻégake',

²³san Dios bseḻe'e bejw ẕan ya'abá, na' bsaljwe' gan ẕžoj da' žseḻe'e zaka' ya'abá,

²⁴na' bene' ga bex̱jw yet maná kan žak yejw, dan' bdawgak benne' chie' ka'. Bneẕjwe' ḻégake' da' naken ka ẕoa' che ya'abá.

²⁵Bdáwgake' da' žawgak wbás che ya'abá ka'. Bséḻa'ḻi'e da' bdáwgake', na' béljgekle'.

²⁶Bene' ga gok to be' da' zan' cheḻa'ale gan ẕḻa' wbíž, na' ḻen yeḻa' wak chie' bene' ga gok be' dan' zan' cheḻa'ale gan ẕde wbíž byo' zag ka',

²⁷na' ka bix̱te yo bseḻe'e beḻa' da' gáwgake', biado' ka' zej zoa x̱ílgakba', da' zanže ka yož da' žen' žoa'a to yegw ẕen.

²⁸Bene' ga béx̱jwgakba' gan zej nnita' benne' ka', na' do ẕente gan zej da' yo'o yid chégake' ka'.

²⁹Bdáwgake'-ba', na' béljgekle'. Dios benne' chégake' da' wdán ḻáže'gake',

³⁰san kate' bi na' yéljgekle', na' ne žáwgake'-ba',

³¹na' bža'a Dios benne' ka' na' bete' benne' Israel ka' zej nakže' benne' waḻe, na' benne' ka' zej nakže' benne' wak.

³²Ḻa'kze bene' ki, na' béngakže' doḻa', na' ḻa'kze bḻé'egekle' yeḻa' wak ka' da' bene', bi bx̱en ḻáže'gake' Ḻe'.

³³Che ḻen bene' nbabze ža chegak benne' ka', na' gókgaken ka to be' da' žeka'ažo, na' ka zej nak yiz da' wnníta'gake' bdie' ḻégake' ḻo da' wẕáka'gake'.

³⁴Kate' bete' baḻ benne' ka', na' yezíka'že' beyákgake' che Dios. Beyát ḻáže'gake', na' dot ḻáže'gake' bḻížgake' Ḻe'.

³⁵Bejsá' ḻáže'gake' nak Dios Benne' žape chi'e ḻégake' na' nape Dios dot yeḻa' ẕen. Ḻekze' beya'we' ḻégake',

³⁶san bi gok ḻi ḻaže' da' wnnábgekle', dan' ben ḻáže'gake' ḻaw Dios.

³⁷Bi gok ḻi ḻáže'gake' ḻen Ḻe', na' bi béngake' dot ḻáže'gake' ka nak x̱tiže'e dan' bénḻene' žo'o.

³⁸San Dios beyache' ḻáže'le' chegak benne' ka', na' benít ḻawe' x̱tóḻa'gake', na' bi bžia yi'e ḻégake'. Zan chi'i beké'e yeḻa' ẕža'a chie', na' bi bže'e ḻégake' dot kan bsa' ḻaže'e.

³⁹Bejsá' ḻaže'e zej nakze' beḻa' žen. Zej nake' ka to be' da' ẕden, na' bi yežinen.

⁴⁰Zan chi'i bží'igake' chie' Ḻe' ḻo latje dachen', na' zan chi'i béngake' ga gok nyache' ḻaže'e Ḻe'.

⁴¹Zan chi'i béngake' da' bi de chawe' Dios, na' béngake' ga bža'a Dios la'y chegak benne' Israel ka'.

⁴²Goḻ ḻáže'gake' ka nak yeḻa' wak ẕen chie', na' ka bene' ḻo ža ka' kate' beya'we' ḻégake' ḻo da' wẕáka'gake',

⁴³kate' bene' yeḻa' wak ẕen ka' ḻo yežlyó Egipto, na' bḻoe'ele' da' ka' da' žóngaken ga žebanlžo, da' ka' bene' ḻo yežlyó Soán.

⁴⁴Bene' ga beyák yegw chegak benne' Egipto ka' žen, na' biž gok yé'jgake' nisen'.

⁴⁵Bseḻe'e bi'a ka' ladjw benne' ka', bia ka' bsáka'gakba' ḻégake'. Bseḻe'e blož ka' nich bchínnjgakba' yežlyó chégake'.

⁴⁶Bseḻe'e biche' zo ka' nich bdáwgakba' linne chégake', na' bžia yí'gakba' da' zej den ḻo yežlyó chégake'.

⁴⁷Bseḻe'e yej nis ẕen da' bchinnjen lba uba chégake' ka', na' bseḻe'e da' zag dan' besbižen yag higo chégake' ka'.

⁴⁸Bseḻe'e yej nis ẕen da' beten bia yix̱e' chégake' ka', na' bseḻe'e yes wzió' da' beten ẕila' chégake' ka'.

⁴⁹Bene' ga wẕáka'ḻe'egak benne' Egipto ka', dan' bžá'aḻi'e ḻégake', na' bseḻe'e da' ka' gókgaken ka wbás zan che ya'abá nich wsaka' zí'gake' ḻégake'.

⁵⁰Bi bsane' yeḻa' ẕža'a chie', na' bi benít ḻawe' chégake' nich bi gátgake', san bete' zángake' ḻen to yižwé' ẕen.

⁵¹Bete' bi' byo nežw ka' chegak benne' ka', bi' byo nežw ka' chegak benne' Egipto ka'.

⁵²Naž bchi'e benne' chie' ka' ka to benne' ẕchi'e ẕila' ka', na' bchi'e ḻégake' ḻe'e latje dach.

⁵³Bchi'e ḻégake' dot chawe', na' bi be bžébegake', san benne' Egipto ka', benne' bi bḻé'egekle' ḻégake' chawe', bete' ḻégake' ḻo nisdo'.

⁵⁴Bchi'e benách chie' ka' ḻo yežlyó la'y chie', gan zej nnita' ya'a ka' wleje' Ḻekze' ḻo na'gak benne' ka' wnníta'gake' nga.

⁵⁵Blage' ḻégake' ḻo yežlyón' ḻawgak benách chie' ka'. Bdise' yežlyó chégaken' ládjwgak benne' Israel ka'. Bnnite'e ḻégake' ližgak benne' ka' bebeje' ga na',

⁵⁶san da' yoble béngake' da' bi de chawe' Dios, na' bža'a Dios, Bennen' nape' dot yeḻa' ẕen. Bi béngake' da' bchi'le' ḻégake'.

⁵⁷Da yoble bží'igake' che Dios kan bengak x̱a x̱tó'gake' ka'. Gókgake' ka to yag ntóche'do' dan' bi zejen to wḻize.

⁵⁸Béngake' ga bže'e Ḻe' ḻen bkog ka' gan bka'n ẕéngake' lo'a ka', na' ni'a che lo'a chégake' ka' bžá'aḻe'e Dios.

⁵⁹Bža'a Dios kate' bḻe'ele' da' ki, na' bi bḻe'ele' benne' chie' ka' chawe', benne' Israel ka'.

⁶⁰Bsan ḻaže'e yo'o yid la'y chie' dan' wzóan yež Silo, yo'o yiden' gan wzoakze' Ḻe' ladjw benne' ka'.

⁶¹Bi'e latje bkwasgak benne' ka' bi bḻé'egekle' žo'o chawe' kaj la'y chien', dan' ẕḻoe'e ḻawn yeḻa' wak, na' yeḻa' ẕen chie'.

⁶²Bže'e benne' chie' ka', na' bdie' ḻégake' ḻo na'gak benne' ka' bétgake' zángake'.

⁶³X̱kwide' byo ka' chégake' gótgakbe' ḻo wdiḻe, na' bi bga'n no benne' byo kwide', benne' wchág ná'ḻenbe' no'le kwide' ka'.

⁶⁴Ḻezka' gotgak bx̱oz ka' chégake' ḻo wdiḻen', na' no'le wzebe ka' chegak bx̱oz ka' bi wžeže nyáche'gake' ni'a chégake'.

⁶⁵Naž gok X̱anžon' ka to benne' žebane' ḻo bichgale. Goke' ka to benne' waḻe ẕbéžeyi'e kate' ba ne'je' x̱is uba waḻ.

⁶⁶Blage' benne' ka' bi bḻé'egekle' ḻégake' chawe', na' bka'ne' ḻégake' ka'ze to chi'ize.

⁶⁷Bzoe' cheḻa'ale ẕa'só José ka', na' bi wžíe' ẕa'só Efraín ka',

⁶⁸san wžíe' ẕa'só Judá ka', na' Ya'a Sión, dan' nží'iḻe'ele'.

⁶⁹Ḻaw ya'a na' bene' yodo' la'y chie', dan' goken ka nak yodo' dan' zoan ya'abá. Bzoa chochen' to chi'ize, ka nakkze yežlyó nga.

⁷⁰Wžíe' Dabí, benne' wen žin chie'. Bebeje' ḻe' gan zej nnita' ẕila' ka'.

⁷¹Bkwase' ḻe' gan zoe' žape chi'e ẕila' ka', nich gake' benne' wnná bia', benne' gape chi'e benách chie' ka', ẕa'só Jakob ka', benne' ka' zej nake' benne' Israel ka'.