Y Salmo Sija 78:12-71

¹²Namanman na güinaja finatinasña gui menan y tatañija, gui tano Egipto, gui fangualuan Soan.

¹³Jadebide y tase ya janafanmalofan gui inanaco sija todo; yan janafañaga y janom taegüije y monton.

¹⁴Ya y jaane janafanenesgaegaejonja ni y mapagajes; yan todo puenge y finañila y guafe.

¹⁵Japanag y acho gue desierto, ya janae sija na ufanguinem taegüije na jumuyong guinin y dangculon tinadong.

¹⁶Ya mañule minilalag locue guinin y acho, yan janafalalago y janom taegüije y sadog.

¹⁷Lao trabia sisigueja mas isagüegüe, ya manmanembeste contra Gueftaquilo gui desierto.

¹⁸Ya sija jatienta si Yuus gui corasonñija, yan mangagagao catne pot y güinaeyañija.

¹⁹Magajet na sija manguentos contra si Yuus; ilegñija: Ada siña si Yuus jafamaulequejit lamasa gui desierto?

²⁰Sa, estagüe, na anae japanag y acho, manjuyong y janom, ya y minilalag manmachuchuda. Ada siña güe manae pan locue? umafamauleg catne para y taotaoña?

²¹Enao mina anae jajungog este, y Señot ninabubo: ya umasonggue y guafe contra as Jacob, yan y linalalo locue cajulo contra Israel;

²²Sa ti jajonggue si Yuus, yan ti jaangoco sija gui satbasionña.

²³Lao güiya tumago y mapagajes guinin y sanjilo; yan jababa y pettan langet.

²⁴Yan janauchan papa y mana gui jiloñija para ujacano, yan janae sija ni y maies y langet.

²⁵Y taotao cumano y na y manmetgot: güiya numae sija catne para ufanjaspog.

²⁶Jatago y manglo sancatan na ufanguaefe gui jalom y langet: yan pot y ninasiñaña jachachalane y manglo sanjaya.

²⁷Janauchan catne locue gui jiloñija taegüije y petbos; yan y pajaro ni gaepapa taegüije inae gui tase;

²⁸Ya japolo ayo sija na ufanbasnag gui entalo y campoñija, ya gui oriyan y sagañija.

²⁹Ya sija jacano, ya mangosjaspog sija; sa güiya numae sija ni y tinangañiñija.

³⁰Lao ti janajanao guiya sija y tinangañija; lao estabaja trabia y catneñija gui jalom y pachotñija,

³¹Ya y binibon Yuus mato gui jiloñija, ya japuno y mas manyomog guiya sija, yan jayute papa y patgon na taotao sija guiya Israel.

³²Lao contodo este, sigueja di maaiisao trabia: yan ti majonggue y mamnamanman na chochoña.

³³Ya pot este na y jaaneñija janafanlinachae ni y banidá; yan y sacanñija gui minaañao.

³⁴Ya anae japuno sija, ayo nae manafaesen pot güiya yan jabira sija ya maaligao guse si Yuus.

³⁵Yan jajaso na si Yuus y achoñija, yan y Gueftaquilo na Yuus y Satbadotñija.

³⁶Achogja ujafaande güe ni y pachotñija yan ujadague ni y jilañija.

³⁷Sa y corasonñija ti tunas guiya güiya: ni ufanfitme gui tratuña.

³⁸Lao güiya, bula minaase jaasie ni y tinaelayeñija, yan ti jayuyulang sija: magajet, megae na tiempo nae jabira y linalaloña, yan ti jajatsa julo y binibuña.

³⁹Sa jajaso na sija catneja; y manglo na malofan ya mapos ya ti mamaela talo.

⁴⁰Cuanto biaje manmanembeste contra güiya gui jalomtano yan manatriste güe gui desierto!

⁴¹Ya manalo tate ya matienta si Yuus; ya macase y Santosgüe guiya Israel.

⁴²Ya ti jajaso y canaeña; ni jaane anae ninafanlibre gui contrario.

⁴³Ni y pineloña na señatña guiya Egipto: yan y ninamanmanña gui fangualuan Soan:

⁴⁴Yan jatulaeca y Sadog janajâgâ; yan y minilalag para chañija fanguiguimen.

⁴⁵Janae megae na lalo para ufanquinano; yan rana sija para ufanyinilang.

⁴⁶Janae y ilo oruga ni y aumentan tano; ya y finachochoñija y apacha.

⁴⁷Jayulang y fangualuanñija ubas ni y ichan grano; yan y trongco igos sija ni y hielo.

⁴⁸Japolo y gañija gâgâ locue gui papa y ichan grano, ya y manadan gañija gui minaepen lamlam.

⁴⁹Jayute gui jiloñija y fijom na binibuña; binibo, linalalo, yan chinatsaga; y manadan manaelaye na angjet sija.

⁵⁰Mamatinas chalan para y linalaloña; ya ti jachoma y antiñija guinin y finatae, lao japolo y linâlâñija gui peste.

⁵¹Ya japuno todo y finenena na finañagon guiya Egipto, y mas magas naminetgotñija gui jalom y tiendan Cam!

⁵²Lao chalane juyong y taotaoña taegüije y quinilo sija, yan jaesgagaejon sija gui desierto taegüije y manadan, gâgâ.

⁵³Ya jachule sija gui seguro, ya sija ti manmaañao: lao y tase tumampe y enimigoñija.

⁵⁴Ya jacone sija asta y oriyan y sinantos na sagaña, güineja na ogso ni y guinanan y agapa na canaeña.

⁵⁵Jayute juyong y nasion locue gui menañija, yan jafacae guiya sija y erensiañija ya jaraya, ya janafañaga y tribon Israel gui jalom y tiendañija.

⁵⁶Lao sija trabia jatietentaja, yan manmanembebesteja contra y Gueftaquilo na Yuus, yan ti jaadaje y tinagoña.

⁵⁷Lao manalo tate, yan manmafatinas dinague taegüije y tatañija: ya manmabira sija gui un banda taegüije y dacon na atco.

⁵⁸Sa macase güe ya mannalalalo pot y sagañija ni taquilo ya masuog güe ya manafanugo ni y imageñija ni tinaga.

⁵⁹Anae jajungog este si Yuus, ninabubo, yan jagoschatlie iya Israel.

⁶⁰Ya pot ayo na jadingo y tabetnaculo guiya Silo, yan y tienda ni y japolo gui entalo taotao sija.

⁶¹Ya janae ni y minetgotña y cautibo, ya y minalagña gui canae y contrario.

⁶²Janae y espada ni y taotaoña: yan ninabubo ni y erensiaña.

⁶³Linachae ni y guafe y manpatgon na lalaje; ya y manpatgon na famalaoan taya cantan umasagua.

⁶⁴Ya y mamaleñija manmodong gui espada; ya y manbiuda sija ti ninafantriste.

⁶⁵Ya y Señot magmata taegüije y uno ni y guinin mamaego, yan taegüije y matatñga na taotao ni y ninaaagang pot rason di y bino.

⁶⁶Ya japuno y enimiguña sija ni y mañasaga gui santate: yan japolo sija güi taejinecog na minamajlao.

⁶⁷Ademas jarechasa y tabetnaculo gui as José, ya ti jaayeg y tribon Efraim.

⁶⁸Lao jaayeg tribon Juda, ayo ogso Sion ni y güinaeyaña.

⁶⁹Ya jafatinas y sinantos na sagaña taegüije y manaquilo na sagayan sija, taegüije y tano na japlanta para taejinecog.

⁷⁰Jaayeg si David locue na tentagoña, yan jacone güe guinin y quelat y quinilo,

⁷¹Chinile güe ni guinin jatatitiye y manmanago na quinilo ya jacone para unafañocho y taotaoña gui as Jacob yan y erensiaña guiya Israel.