SALMOS 74:1-19

¹Toteco Dios, ¿para ten techtahuelcajtoc para nochipa? ¿Para ten tahuel ticualani ica tojuanti cati tiitztoque quej timopilborregojhua?

²Xiquelnamiqui para tojuanti timomasehualhua cati timocohui huejcajquiya quema titetequipanohuayayaj san tapic. Quena, techtapejpeni para techchihuas timoaxcahua. Nojquiya tijtapejpeni nopa altepet Jerusalén para tijchihuas quej elisquía mochaj ipan ni taltipacti.

³Xihuala xiquitaqui quenicatza quitamisosolojtoque nopa altepet, huan xijtachili quenicatza tocualancaitacahua quisosolojtoque motiopa.

⁴Nopona tzajtzique mocualancaitacahua ica paquilisti quema tasosolojque. Teipa san techhuetzquilijque huan quinquetzque ininteteyohua para quinextise ya techtantoyaj.

⁵Hualajque ica inihachas huan huejhueyi martillos hasta nesiyaya quej cuajcuahuini tatajco cuatitamit.

⁶Huan ama ica ininteposhua quitapanque huan quisosolojtoque nochi tamanti cati ica tayejyecchijtoyaj motiopa.

⁷Quena, motiopa quitatijque, huan quimahuispolojque moyoyoncal cati quihuicayaya motoca, huan quitahuisojque talchi.

⁸Huan quiijtojque ipan iniyolo: “Ma tijtamisosoloca nochi cati onca ipan ni tali.” Huan yajque campa hueli huan quitatijque nochi israelita tiopame, campa timosentiliyayaj para timitzhueyichihuase, Toteco Dios.

⁹Ayecmo onca yon se tamanti cati quinextía para timomasehualhua. Ayecmo onca tajtolpanextiani. Ayecmo aqui huelis techilhuis hasta quema tamis nochi ya ni.

¹⁰Toteco Dios, ¿hasta quema tamis mitzmahuispolohuaj mocualancaitacahua? ¿Amo quema tiquintatzacuiltis?

¹¹¿Para ten tihuejcahua para techpalehuis? ¿Para ten amo tijnextía mohueyi chicahualis huan techpalehuía?

¹²Hasta ten huejcajquiya Toteco Dios eliyaya notanahuatijca. Yaya nechpalehuijtoc ipan ni taltipacti huan campa hueli campa niyajtoc.

¹³Ica mochicahualis tijxelo hueyi at. Huan tiquintzontamilti huejhueyi tapiyalme cati temajmatijque cati itztoyaj ipan at.

¹⁴Tijtzonxamani nopa hueyi tapiyali cati itoca Leviatán, huan inacayo tiquinmacac ma quicuaca nopa tecuanime cati itztoyaj ipan huactoc tali.

¹⁵Tijchijqui ma meya at ipan huejhueyi amelme huan para hueyame ma quipiyaca at. Nojquiya tiquinhuatzqui hueyame cati amo quema huactoyaj.

¹⁶Ta moaxca tonali huan yohuali. Ta tijchijchijqui metzti huan tonati.

¹⁷Ta tijtamachijqui hasta canque tamis taltipacti. Nojquiya ta tijchihua ma tatotoniya huan ma taseseya.

¹⁸TOTECO, xiquita quenicatza mitzmahuispolohuaj mocualancaitacahua, huan quenicatza mitztaijilhuíaj nopa masehualme cati mohueyimatij.

¹⁹¡TOTECO, amo techtahuelcahua! Xijmanahui mopaloma imaco nopa cuatojti. Quena, xiquinmanahui momasehualhua inimaco nopa masehualme cati itztoque quej tecuanime.