Salmos 73:2-25

²Neda' ba guzúa cheajcházia' lu dul-la. Ba guzúa guna' tu da zrinnaj,

³lawe' da guca' zre'e lazre' ne̱ chee̱ benne' gunní'a ca', gate ble'eda' ca dxelepe ban benne' ca' zaj nabéaj xíchaje̱' Dios.

⁴Benne' caní quebe zaj zue̱' ste̱be chee̱ xel-la' gute, lawe' da zaj zúale̱'e̱ chawe'.

⁵Quebe dxeledée̱' lu da ba xa' ca da dxeledé xúgute̱ benne' ca', ne quebe dxelezaca zi'e̱ ca da dxaca chee̱ xezícadxa bénneache.

⁶Chee̱ le̱ na' dxulucá'ana szren cuine̱'. Tu dxelexúbezquezne̱' dxelune̱' da cale̱la.

⁷Dxelánnie̱' lawe' da dxelagu cháwele̱'e̱. Dxelezíle̱'e̱ ca naca da dxelezá lazre̱'.

⁸Dxelún le̱' chee̱ Dios, ne dxelenné̱' cale̱la ca da zrinnaj da xelune̱'. Dute̱ xel-la' dxulucá'ana szren cuina dxuluchálaje̱' da zrente̱.

⁹Dxelenné̱' chee̱ da ca' zaj zua xabáa, ne dxuluchálaje̱' ca benne' zaj nape̱' dute̱ xe̱zr la xu.

¹⁰Chee̱ le̱ na' xúgute̱ bénneache dxelune̱' le̱' tu zren, ne dxelezi'e̱ ca da dxelenná benne' gunni'a ca'.

¹¹Dxelenná benne' ca' dxelune̱' da cale̱la: “¿Ájazra gaca neze Dios? ¿Dxelé'equeze Bénnea' zue̱' na'ala?”

¹²Benne' caní zaj naque̱' benne' zaj nabéaj xíchaje̱' Dios, na' dxelepe bane̱' lu xe̱zr la xu, ne dxelaque̱' gunní'a.

¹³Da líqueze, dácheze naca guca' du lazre', ne quebe bi da cale̱la nuna'.

¹⁴Gudéa' lu da ba xa' tu zra tu zra, ne gudéa' xel-la' zi' xúgute̱ zra.

¹⁵La nnia' neda': Guchálaja' ca dxuluchalaj benne' ca', na' si xe̱'a bénneachedu ca' chiu', Dios.

¹⁶Gate blaba lazra' chee̱ chéajni'ida' da nigá, guca na sté̱bele̱'e̱ chia' neda'.

¹⁷Gate guxu'a lu lataj lá'azxa chee̱ Dios, na' guque be'eda' da gaca chee̱ benne' ca' gate cheajsé̱.

¹⁸Da líqueze nunu' chee̱ benne' ca' cheajlecházie̱', ne gunu' xelebía xí'queze̱'.

¹⁹Chadite̱ gulebía xí'queze̱'. Belexenite̱' lu xel-la' gulezrébele̱'e̱.

²⁰Zaj naque̱' ca tu da ble'edxu lu xe̱la da dxexenite na gate dxexebandxu. Ca'an gaca, Xran, gate chasu', guzú' chalá'ala ca da gulaca benne' ca'.

²¹Gate guca' zre'e lazre' chee̱ benne' ca', guzúa lázrdawa' lu da ste̱be.

²²Lawe' da guca' xichaj zide', na' quebe guxéajni'ida' guca' ca tu be̱ xixre' lau Lue'.

²³Tu guzúazqueza' nen Lue', na' guca'u na'a xabe̱la.

²⁴Bsi'u neda' chee̱ guna' da dxulé'enu' neda', na' te nigá xezí' lu na'u neda' lu xabáa chiu'.

²⁵Quebe nu xetú zua chia' xabáa san tuzu' Lue', ne quebe nu xetú dxezá lazra' lu xe̱zr la xu, san tuzu' Lue'.