Zebur 73:2-25

²Lékin özüm bolsam, putliship yiqilip chüshüshke tasla qaldim; Ayaghlirim téyilip ketkili qil qaldi;

³Chünki rezillerning ronaq tapqanliqini körüp, Hakawurlargha heset qildim;

⁴Chünki ular ölümide azablar tartmaydu, Eksiche téni mezmut we saghlam turidu.

⁵Ular insan'gha xas japani körmeydu, Yaki xeqlerdek balayiapetke uchrimaydu.

⁶Shunga meghrurluq marjandek ulargha ésilidu, Zorluq-zomigerlik tondek ulargha chaplishidu.

⁷Ular semrip ketkenlikidin közliri tompiyip chiqti; Ularning qelbidiki xiyaletler heddidin éship kétidu.

⁸Bashqilarni mesxire qilip zeherlik sözleydu; Halini üstün qilip diwinip, doq qilidu.

⁹Ular aghzini pelekke qoyidu, Ularning tilliri yer yüzini kézip yüridu.

¹⁰Shunga Xudaning xelqi mushulargha mayil bolup, Ularning dégenlirini su ichkendek axirighiche ichip: —

¹¹«Tengri qandaq bileleytti?», «Hemmidin Aliy Bolghuchida bilim barmu?» — deydu.

¹²Mana bular rezillerdur; Ular bu dunyada rahet-paraghetni köridu, Bayliqlarni toplaydu.

¹³«Ah, heqiqeten bikardin-bikar könglümni paklanduruptimen, Gunahsiz turup qolumni artuqche yuyup keptimen;

¹⁴Bikargha kün boyi japa chékiptimen; Shundimu her seherde wijdanning eyibige uchrap keldim!».

¹⁵Biraq men: — «Bundaq désem, Bu dewrdiki perzentliringge asiyliq qilghan bolmamdimen?» — dédim.

¹⁶Ularni kallamdin ötküzey désem, Közümge shundaq éghir köründi.

¹⁷Tengrining muqeddes jaylirigha kirgüche shundaq oylidim; Kirgendila yamanlarning aqiwitini chüshendim.

¹⁸Derweqe Sen ularni téyilghaq yerlerge orunlashturisen, Ularni yiqitip pare-pare qiliwétisen.

¹⁹Ular közni yumup achquchila shunche parakende bolidu, Dehshetler ularni bésip yoqitidu!

²⁰Sen i Reb, chüshtin oyghan'ghandek oyghinip, Ornungdin turup ularning siyaqini közge ilmaysen.

²¹Yüreklirim qaynap, Ichlirim sanjilghandek bolghan chaghda,

²²Özümni héchnéme bilmeydighan bir hamaqet, Aldingda bir haywan ikenlikimni bilip yettim.

²³Halbuki, men hemishe Sen bilen bille; Sen méni ong qolumdin tutup yöliding;

²⁴Öz nesiheting bilen méni yétekleysen, Shan-sheripngni namayan qilghandin kéyin, Axirida Sen méni özüngge qobul qilisen.

²⁵Ershte Sendin bashqa méning kimim bar? Yer yüzide bolsa Sendin bashqa héchkimge intizar emesmen.