Pisalem 73:2-25

²Dogu hagadagadagagee gu hoohoo hua bolo ga hagalee. Dogu hagadonu la di mee hua dulii bolo ga hagalee,

³idimaa, au gu dubua gi digau hagamuamua i dogu gidee au digau huaidu e noho manawa lamalia ang gi ginaadou.

⁴Nia hagadilinga hagaduadua hagalee tale gi digaula. Digaula e maaloo, hagalee magi.

⁵Digaula hagalee haingadaa ang gi ginaadou be digau ala i golo. Digaula hagalee tale gi nia haingadaa gadoo be digau ala i golo.

⁶Di hagamuamua dela e laagei digaula le e hai gadoo be di hau uwa, mo di hagahinihini le e hai gadoo be di gahu laa daha.

⁷Nia manawa digaula e malingi mai nia huaidu, gei lodo digaula e honu i nia hagabaubau huaidu.

⁸Digaula e gadagada gi digau ala i golo gei e helehelekai i nia mee huaidu. Digaula e hagamuamua e hagatataele nadau hai huaidu belee haga daamaha digau ala i golo.

⁹Digaula e helehelekai huaidu i God dela i di langi, ge e hai nadau haganoho maaloo ang gi digau huogodoo i henuailala.

¹⁰Malaa, nia daangada a God hogi ga daudali digaula, ga hagadonu nia mee huogodoo ala e helehelekai ai digaula.

¹¹Digaula e helekai, “God le e de iloo ia! Tangada di Gowaa Aamua la hagalee gidee ia!”

¹²Deenei di hai o digau huaidu. Digaula e maluagina, ge nadau maluagina e logo mai.

¹³Malaa e hai behee? E balumee hua go dogu mouli madammaa ge digi hai dagu huaidu?

¹⁴Meenei God, au gu duadua i di laangi dogomaalia, gei Goe gu hagaduadua au i nia luada huogodoo.

¹⁵Maa au gu helekai nia hagadilinga mee beenei, malaa, au gu hagalee hai be tangada ni au daangada.

¹⁶Au gu hagamada gu hagabaubau di haingadaa deenei bolo gii donu ginai au, gei di maa gu haingadaa huoloo mai gi di au,

¹⁷gaa dae loo gi dogu madagoaa ne hana gi lodo do Hale Daumaha. Gei au guu donu laa gi di mee dela gaa hai ang gi digau ala e huaidu.

¹⁸Goe gaa dugu digaula gi di gowaa malali e hai digaula gi monnono gii mmade!

¹⁹Digaula ga daaligi hagalimalima, digaula gaa mmade i di made hagamadagudagu dangada huoloo.

²⁰Meenei dogu Dagi, digaula e hai gadoo be di midi dela ma gaa ngala i di luada. Do madagoaa ma ga ala aga, gei digaula gu hagalee.

²¹Di madagoaa hua o agu maanadu ne huaidu, gei au gu manawa gee labelaa,

²²au gu dadaulia gadoo be di manu. Au gu hagalee modongoohia eau Goe.

²³Gei deeai. Au e noho i doo baahi i nia madagoaa huogodoo, gei Goe e kumi dogu lima.

²⁴Au agoago e dagi au gi di ala o do manawa, di laangi hagaodi, gei Goe ga benebene au gi lodo o madamada.

²⁵Au dogu dangada i di langi ai, deelaa hua Kooe. Ma deai di mee i henuailala e hiihai ginai au i daha mo Goe ai.