Salmos 73:19-28

¹⁹Chadite̱ gulebía xí'queze̱'. Belexenite̱' lu xel-la' gulezrébele̱'e̱.

²⁰Zaj naque̱' ca tu da ble'edxu lu xe̱la da dxexenite na gate dxexebandxu. Ca'an gaca, Xran, gate chasu', guzú' chalá'ala ca da gulaca benne' ca'.

²¹Gate guca' zre'e lazre' chee̱ benne' ca', guzúa lázrdawa' lu da ste̱be.

²²Lawe' da guca' xichaj zide', na' quebe guxéajni'ida' guca' ca tu be̱ xixre' lau Lue'.

²³Tu guzúazqueza' nen Lue', na' guca'u na'a xabe̱la.

²⁴Bsi'u neda' chee̱ guna' da dxulé'enu' neda', na' te nigá xezí' lu na'u neda' lu xabáa chiu'.

²⁵Quebe nu xetú zua chia' xabáa san tuzu' Lue', ne quebe nu xetú dxezá lazra' lu xe̱zr la xu, san tuzu' Lue'.

²⁶Dxelexedú lazre' be̱la' dxen chia', ne lázrdawa'. Dios naque̱' Benne' dxutipe̱' lazra', ne naque̱' da ba neza chia' chadía chacanna.

²⁷Benne' ca' dxelexecuase̱' naga zu' xelexenítie̱'. Guzría xi'u xúgute̱ benne' ca' xelexebeaj xíchaje̱' Lue'.

²⁸Ca naca chia' neda', dxaca chawe' chia' lawe' da gubiga' lau Dios. Tu dxebeza lázrezqueza' Xránadxu Dios, chee̱ guchálajqueza' ca naca da zrente̱ da nune̱'.