SALMOS 72:2-8

²Xijpalehui para quintajtolsencahuas xitahuac nochi momasehualhua, huan cati teicneltzitzi nojquiya.

³Xijchihua para nochi ipan ni tali ma paquica pampa nopa tanahuatijquet quichihua cati xitahuac, hasta eltoc quej nochi cuame cati onca ipan tepeme huan ipan tachiquilme nojquiya paquij huan temacaj cuali inintajca.

⁴Yaya quinmanahuis cati itztoque ipan tequipacholi huan cati amo teno quipiyaj. Nojquiya ma quintatzacuilti nopa masehualme cati tetaijyohuiltíaj.

⁵Huan cati teicneltzitzi huan amo teno quipiyaj mitzimacasise mitzixpanose nochi tonali quema noja eltos tonati huan metzti. ¡Quena, ma mitzhueyimatica para nochipa!

⁶Huan nochi altepeme ipan itanahuatilis nocone ma eli cuajcualtzi huan temachti, quej nopa at cati huetzi para ma chamanica cuame, o quej nopa ajhuechti cati quixolonía nopa tali.

⁷Huan nochi masehualme cati itztoque xitahuaque huan cuajcualme, ma itztoca ica cuajcualtzi quema yaya tanahuatis. Quema yaya tanahuatis, oncas miyac tasehuilisti hasta itamiya tonali.

⁸Itanahuatilis nocone ma ajsi hasta campa pehua huan hasta campa ontami nopa hueyi at. Ma ajsi ten campa nopa hueyi at Eufrates hasta campa ontantoc taltipacti.