Salmos 65:2-11

²Lue' dxénqueznu' da dxuchálajle̱ntu' Lue', na' xelelá' lau Lue' xúgute̱ bénneache.

³Nabágale̱'a da zrinnaj da be̱na', san Lue' dxunite lau' ca da gudábagantu' Lue'.

⁴Ba neza zrente̱ naca na chee̱ bénnea' dxeca'u Lue', ne dxenníu' le̱' gaque̱' chiu', chee̱ súaqueze̱' lataj lá'azxa chiu'. Xélajquezentu' da xrlátaje da de̱ lizru', da ca' da zaj de̱ xudau' lá'azxa chiu'.

⁵Lu da xrlátaje chiu' gunu' da zaj naca zrente̱ gate gunu' ca da dxenábantu' Lue', Dios, Benne' dxuselé̱' netu'. Xúgute̱ bénneache zaj zra' dute̱ xe̱zr la xu dxelebeza lazre̱' Lue', ne cá'anqueze dxelebeza lazre' benne' dxeledée̱' zítu'la lawe' nísadau'.

⁶Lué'queze dxuzúa chuchu' xi'a zren ca' nen xel-la' waca chiu'. Nácaquezu' Benne' wal-la.

⁷Dxebeche zriu' nísadau' gate dxelucu na, ne schaga da dxelún xeajxruza chee̱ na. Dxebeche zriu' benne' xe̱zr la xu gate dxeledábague̱' Lue'.

⁸Chee̱ le̱ na' benne' zaj zre̱'e̱ dute̱ xe̱zr la xu xelezrebe̱' ca naca da zrente̱ da dxunu'. Dxuzú' lu da ba neza bénneache zaj zra' du gabí'i xe̱zr la xu.

⁹Dxenna'u xe̱zr la xu, ne dxesel-lu' nisa xiuj. Dxunu' dxúnnale̱'e̱ na lina chee̱ na. Nuzúaquezu' lu xe̱zr la xu xe̱gu ca' da zaj de̱le̱'e̱ na nisa. Dxucuezu' zrua' za da xelagu bénneache, ca ba núnquezu' gaca na.

¹⁰Dxesel-lu' nisa xiuj naga ba zaj nune̱' na'. Dxunu' dxexaca na xu xa'a. Dxuculu na nen nisa xiuj na'. Dxunu' dxelegula chawe' da du ca' ba zaj naxaza na.

¹¹Dxunu' dxelexezí' bénneache ba neza tu iza tu iza ne̱ chee̱ da dxunézruju', na' ca zaj naca beuj bza chiu' dxelunna na xiuj da dxun na dxelegula chawe' da zaj naza bénneache.