SALMOS 65:2-11

²Le' ženkzlo' da' ẕcháḻjḻento' Le', na' ḻa'gak yógo'te benne' ka' ḻawo' Le'.

³Nbága'ḻi'a da' ẕinnj da' bena', san ženít ḻawo' Le' da' bži'ito' chio' Le'.

⁴Ba nez ẕen naken che bennen' ẕbio' Le', na' ẕnno' nake' chio', nich soakze' latje la'y chio'. Yeljkzto' da' chawe' da' de ližo', dan' den ḻo yodo' la'y chio'.

⁵Ḻo da' chawe' da' nako' gono' da' ẕenḻe'e kate' gono' da' ẕnnablto' Le', Dios, Benne' Weslá cheto'. Yógo'te benne' nníta'gake' yežlyó žx̱en ḻáže'gake' Le'. Ḻezka' žx̱en ḻáže'gak benne' ka' Le', benne' ka' ẕdégake' zíto'le ḻaw nisdo'.

⁶Le' ẕzoa chocho' ya'a ẕen ka' ḻen yeḻa' wak chio'. Nakkzo' Benne' waḻe.

⁷Ẕbek žio' nisdo' kate' ẕgo'nen, na' žaẕto' da' žonen. Ẕbek žio' benne' yež ka' kate' žóngake' žo'osbé.

⁸Che ḻen benne' ka' nníta'gake' dot yežlyó ẕžébegake' da' ẕenḻe'e da' žono'. Ẕnnito'o benne' ka' ḻo yeḻa' ba nez, benne' ka' nníta'gake' do ẕente yežlyó.

⁹Ẕwio' yežlyó, na' žseḻo'o nis yejw. Žono' ga žonnḻe'en linne chen. Bnnito'o yegw ka' ḻo yežlyó da' zej nža'ḻe'en nis. Ẕkwezo' ẕoa' za da' gawgak benne' ka', kan wnnakzo' gono'.

¹⁰Žseḻo'o nis yejw gan de na, na' žeyonon' yo ya'a. Žesbison' ḻen nis yejw na', na' žono' ga ẕgól-ḻe'egak da' zej nazen ga na'.

¹¹Žono' ga gak chegak benne' ka' yeḻa' ba nez to yiz to yiz ni'a che da' ẕneẕjo', na' bejw gasj chio' ka' žónngaken yejw da' žonen ga ẕgolgak da' zej nazen.