Sam 65:2-11

²sina hoke olaṉi Goi sari na vinaravara. Ke sari doduru tinoni pa kasia popoa si kaqu mae koa Goi,

³koa gua koari na dia sinea. Tava kilasa si gami koa gua koari na mami sineke tinarae, ba taleosaeni gami Goi.

⁴Tamanae tugo sa tie pu vizatia Goi pude koa tata koa Goi pa Mua vasina hopena. Kaqu qetu nia gami sa lineana koasa Mua vetu hopena sapu sa Mua Zelepade hope.

⁵Pa Mua inolaṉa si poni gami Goi sa minataqara, meke variva magasa sari na Mua tinavete pude harupu gami. Sari doduru tie pa kasia popoa meke pa kali karovodi rina kolo si kalavarae Igo si Goi.

⁶Agoi sapu va turui sari na toqere pa Mua ṉiniraṉira, meke vata dogoro nia Goi sapu na patutokaemu si Agoi.

⁷Va bulei Goi sari na ovaṉadi rina kolo lamana, meke sa puzakadi rina tovovo, va nosoa Goi sa vinari kakatorai tadi na tinoni.

⁸Sa doduruna sa kasia popoa si magasa hola ni sari na tiṉitoṉa pu evaṉi Goi, meke velavela nia rini pa kinera vinahesi na qinetuqetu.

⁹Va hoqa ia Goi sa ruku pude kopu nia sa kasia popoa meke va masuria. Va siṉi ni kolo Goi sari na ovuku. Ponia linetelete Goi sa pepeso. Gua asa kopu gunia Goi sa pepeso.

¹⁰Va gorea Goi sa luturu koari na ilaka pepeso pu ta gelidi pude va bobosi. Va malohori Goi sari na pepeso koasa ruku remiremisi, meke va toqoli Goi sari na linetelete.

¹¹Va masuria Goi sa vuaheni, ke soku sa pinakepakete pa inuma. Vasina la Goi si koa tugo sa minamutu.