SALMOS 5:4-10

⁴Ta tiToteco Dios cati amo mitzpactía cati amo cuali. Yeca amo tiquincahuilía amo cuajcualme ma itztoca mohuaya.

⁵Cati mohueyimatij amo hueli moquetzase moixpa. Tiquincualancaita nochi cati quichihuaj cati amo cuali.

⁶Tiquintzontamiltía masehualme cati istacatij. Quena, TOTECO, amo tijnequi tiquinitas cati tacajcayahuaj huan temictíaj.

⁷Pero na, pampa hueyi motaicnelijcayo, huelis nicalaquis mochaj. Quena, huelis nimitzhueyichihuas ipan motatzejtzeloltijca tiopa, pampa nimitztepanita huan nimajmahui para nimitzixpanos.

⁸TOTECO, techyacana quej nohuaya timocajtoc tijchihuas, pampa itztoque nocualancaitacahua. Technextili moojhui cati xitahuac.

⁹Nocualancaitacahua amo quema quiijtohuaj cati melahuac. Amo aqui hueli motemachía ipan inincamanal. Ipan iniyolo san quinequij tetzontamiltise. Inincamac eltoc fiero quej quema quitapohuaj se mijca ostot. Tecamanalhuíaj ica camanali cati cuajcualtzi san para tacajcayahuase.

¹⁰Xiquintatzacuilti, noTeco Dios. Xiquinmasilti ica cati amo cuali moilhuijtoque quinchihuilise sequinoc. Xiquinhuejcamajcahua pampa miyac inintajtacolhua. Quena, xiquinhuejcamajcahua pampa mohuejcatalijtoque ten ta.