SALMOS 56:1-8

¹NoTeco Dios, techtasojta, pampa nocualancaitacahua semilhuit nechtepotztocatinemij. Nochi se tonal nechtaijyohuiltíaj.

²Nochi se tonal nechcuatetzopaj huan noca paquij. Tahuel miyaqui itztoque cati quinequij nechtamiltise.

³Pero quema nijmati nimajmahui, na nimotemachía ipan ta.

⁴Nijhueyichihua Toteco Dios huan nimotemachía ipan ya para nechmanahuis quej techtajtolcahuilijtoc quichihuas ipan icamanal. Huajca pampa nimotemachía ipan ya, ¿taya huelis nechchihuilis se masehuali?

⁵Talojtzitzi quipataj nocamanal huan san moilhuíaj quenicatza huelis nechchihuilise cati amo cuali.

⁶Mosentilíaj huan quisencahuaj taya nechchihuilise. Teipa motatíaj ojtenti huan nechchiyaj ma nipano para nechmictise.

⁷Toteco Dios, xijtachili nochi inintaixpanolhua huan xiquintatzacuilti. Ica mohueyi cualancayo, xiquintahuiso hasta talchi.

⁸Ta techitztoc quesqui hueltas nimochololtijtoc huan nimochoquilijtoc. Nochi noixayo tijsentilijtoc huan ticajoctoc ipan se frasco. Huan ipan moamatapohual tiquijcuilojtoc quesqui imiyaca.