SALMOS 49:1-11

¹Cuali xijtacaquilica ya ni, amojuanti cati campa hueli anitztoque ipan ni taltipacti.

²Nocamanal elis para nochi. Elis para cati tominpixtoque huan para cati teicneltzitzi. Elis para cati quipiyaj tequiticayot huan para cati amo quipiyaj tequiticayot. Huajca xijtacaquilica.

³Nicamanaltis ica talnamiquilisti. Nimechpohuilis nochi cati nimoyolilhuijtoc ipan noyolo.

⁴Achtohui nimechilhuis se tatzintoquili cati totalnamijca huejcapan tatahua quiijtojque, huan nitatzotzonas ica se arpa huan nihuicas para nimechmatiltis taya quinequi quiijtos:

⁵¿Para ten monequi nimomajmatis quema hualas taohuijcayot, huan quema nopa tajtacolchijca masehualme cati nechcualancaitaj hualase nechyahualoquij?

⁶Inijuanti motemachiyaj ipan inintomi, huan mohueyimatij pampa quipiyaj miyac tamanti cati pajpatiyo.

⁷Pero yon se ten inijuanti amo huelis momaquixtis ten itajtacolhua, yon amo huelis quimaquixtise se iniicni. Amo aqui huelis quitaxtahuis Toteco Dios para ma quimaquixti.

⁸Pampa tonemilis eltoc se tamanti cati miyac ipati. Amo onca yon se tomi ipan nochi taltipacti cati ica huelis moixtahuas.

⁹¡Amo! Amo aqui huelis quicohuas inemilis para itztos para nochipa huan para amo quema miquis.

¹⁰Nochi masehualme miquise. Cati talnamiquij huan cati mohueyimatij, huan nojquiya nochi cati huihuitique, san se ininpantis. Mictehuaj huan quicajtehuaj nochi cati pajpatiyo quipiyayayaj. Huan sequinoc moaxcatise.

¹¹Inijuanti moilhuíaj itztose para nochipa, yeca quicualtalíaj ininchajchaj huan quitalíaj inintoca ipan inintal, quej elisquía iniaxca para nochipa.