SALMOS 40:11-14

¹¹TOTECO, nijmati amo quema tijcahuas techtasojtas. Nimochiya ipan moteicnelijcayo, pampa ta nochipa techmocuitahuis.

¹²Miyac tequipacholi nijpiya campa hueli. Amo hueli nijpohua nochi. Notajtacolhua nechtantoc huan nichoca hasta amo hueli nitachiya. Notajtacolhua nelmiyac hasta quipano imiyaca notzoncal. Tantinemi noyolo huan nochicahualis.

¹³TOTECO, techmanahuiqui. Quena TOTECO, ximoisihuilti huan techpalehuiqui.

¹⁴Ma mopinahualtica huan ma mocuapoloca cati quinequij nechtzontamiltise. Xiquinquixti cati nechcualancaitaj huan tahuel xiquinpinahualti.