SALMOS 37:20-39

²⁰san kwia yi'gak benne' wen da' ẕinnj ka', na' benne' ka' ẕží'igake' che X̱anžon', gak chégake' ka žak chegak yeje yix̱e' ka'. Te chégake', na' nítgekle' ka ẕnit žen che yi'.

²¹Benne' ka' bi zej nake' chawe' to da' ẕnnábgake' to chí'ido'ze, san bi ženéẕjwgaken', san benne' chawe' žeyache' ḻáže'le' lježe' ka', na' ẕneẕjwe' bi da' žiážjele'.

²²Benne' ka' ẕḻe'el X̱anžon' ḻégake' chawe', gata' chégake' yežlyó, san benne' ka' bi ẕḻe'ele' chawe', kwia yí'gakkze'.

²³Da' žongak benne' chawe' ka' naken da' bḻoe'el X̱anžon' ḻégake', na' ẕḻe'ele' chawe' yógo'te da' žóngake'.

²⁴Kate' chejchégwgak benne' chawe' ka', bi chejchégwgake' to chi'ize dan' nox̱w X̱anžon' ná'gake'.

²⁵Goka' x̱kwide', na' na'a naka' benne' gole, na' batkle bḻe'ela' to benne' chawe' wsán Dios ḻe', na' bi ẕdagak ẕa'sógake' ka' ẕnnábgakbe' bi da' gonn no benne' chégakbe'.

²⁶Benne' chawe' ki žeyache' ḻáže'tezle', na' ẕneẕjwe' bi da' žiážjele no benne', na' ẕa'sóe' ka' žak yeḻa' ba nez chégake'.

²⁷Biž gono' da' bi nak chawe', san ben da' chawe', na' so' nbankzo' to chi'ize,

²⁸dan' nži'il X̱anžon' da' nak ḻi ḻaže', na' bi žsane' benne' chie' ka'. To chi'ize gape chi'ikze' ḻégake', san wžía yi'e lježgak benne' ka' bi zej nake' chawe'.

²⁹Benne' chawe' ka' gata' chégake' yežlyó nga, na' nníta'gake' to chi'ize ḻo yežlyón'.

³⁰Benne' chawe' ẕchaḻjze' da' žejni'ile', na' ka ẕchi'a ḻaže'e naken chawe'.

³¹Da' bchi'le Dios ḻe' yo'on yichj ḻáẕda'we'. Che ḻen bi chejchegwe'.

³²Benne' wen da' ẕinnj ẕḻe'ele' benne' chawen', na' žon byene' gote' ḻe'.

³³Bi wsán X̱anžon' ḻe' ḻo na' bennen' bi nake' chawe', na' bi wžía yi'e ḻe' kate' wchi'a ḻaže'e ḻe'.

³⁴Bx̱en ḻaže' X̱anžon', na' ben ka ẕnna x̱tiže'e, na' Ḻe' wchiskze' le' nich gata' chio' yežlyó nga. Kate' kwia yi'gak benne' doḻa' ka', na' ḻe'elon'.

³⁵Bḻe'ela' to benne' wen da' ẕinnj, benne' ẕente, na' góta'ḻe'e da' nape' ka da' ẕneẕjw to yag ẕente,

³⁶san wdé chie', na' biž zoe' na'a. Bejdilja' ḻe', san bi bežeḻ-la'-ne'.

³⁷Blab ḻaže' ka nak che benne' ḻi ḻaže', na' bwia bennen' nake' chawe', dan' ga ze ḻawte gak to yeḻa' ba nez ẕen che bennen' zoe' ḻo yeḻa' ẕga'n chawe',

³⁸san benne' wen da' ẕinnj ka' kwia yí'gakkze'. Bi soa no lježgak benne' wen da' ẕinnj ka',

³⁹san X̱anžo Dios yeslé' benne' chawe' ka', na' Ḻe' gon choche' benne' ka' kate' bi gak chégake'.